Music festival ropui Coachella a ṭiak ta

April 12 aṭanga neih ṭan Coachella Valley Music and Arts Festival chu nimin khan a ṭiak ta. He festival-ah hian khawvel hmun hrang hrang aṭangin milar tam tak an fuankhawm a, ngaihhlut a hlawh tak zet a ni.

Coachella Festival-ah hian khawvel huapa zaithiam lar ber ber te an inlan a, chung zingah chuan Childish Gambino, Ariana Grande, Tame Impala, Billie Eilish, The 1975, Kacey Musgraves leh Janelle Monáe te pawh an tel. A tawp khar ni hian - Kanye West, Bad Bunny, Jaden Smith, Tame Impala, Billie Eilish leh Sofi Tukker te pawh an inlan a, Bob Moses, Mac DeMarco, Rüfüs Du Sol leh DJ Dillon Franci bakah Nina Kraviz ten boruak an siam viau bawk.

Hengho bakah hian Electronics Dance Music (EDM) huanga artist ṭha ber ber te an perform a, K-pop lam aṭangin Blackpink te an peform bawk. South Korean girl group lar Blackpink te hi he festival-a an inlan vawi khatna a ni a, lawm an hlawh rem rem hle. Blackpink te hian an hla thar 'Kill This Love' hmangin mipui an awi a, Jisoo, Jennie, Rosé leh Lisa te chetla vel hmuh a nuam hle.

Coachella Festival-ah hian American singer Ariana Grande chu headliner a ni a, boruak a vaw hot hneh hle. 'Thank U, Next' singer hian a perform aṭang hian sum a lalut hnem hle niin an sawi a, headliner zinga hlawh hnem ber niin an sawi hial.

Grande hian nikuma Beyoncé-i'n US dollar maktaduai riat zet a lo hlawh tawh chu a rawn khum niin an sawi a, ṭhenkhatin an hlawh zat a inang niin an sawi ve thung. Hei ringawt pawh hian titi a luah hneh hle a, thu chiang tak hriat tur awm lo mah se an hlawh hnem thawkhat hle tih a lang!

YouTube chuan Coachella Festival hi live-in an pechhuak a, viewer pawh an tam hle. Viewer hi maktaduai 82.9 vel zet niin an sawi a, kum hmasa aiin entu an tam zawk a ni.