Backstreet Boys ten kum 26 an tling ta

American vocal group lar Backstreet Boys te hi April 20, 1993 khan Orlando, Florida-ah an indin a, tunah chuan kum 26 hmel an lo hmu ta der mai. Backstreet Boys te hian an band kum 26 tlin lawm nan hian Instagram lamah an thlalak hlui an pholang a, fans lam pawhin an hlut hle.

Kar kalta Inrinni kha an band din champha niin, "Kum 1993 vawiin ni angah khan 'Backstreet Boys' hi a lo piang a, tun dinhmun hi kan thleng ta a ni," tiin an tarlang a, an thlalak ṭhenkhat an pholang bawk. An band duhsaktute chungah lawmthu an sawi rualin, "Kum tam tak a la awm a ni," an ti a, chawlh zai an la rel hmel loh hle.

Backstreet Boys te hi hun eng emaw chen an reh hnuah tun hnaiah thawm an rawn nei thar leh ta a, world tour nei turin an inbuatsaih mek a ni. Tour hi North America lamah an nei dawn a, a boruak pawh a hot tawh hle a ni.