Ṭhazual Fakna Zela Chuaungo 'Lunghlu' a hlu ber

Zela Chuaungo chuan hla phuah bakah zai pawh a thiam tih lantirin, a hla thulkhung 'Lunghlu' hmangin Ṭhazual Fakna chart-ah dinhmun sang ber a luah. Tun hi chart-a No.1 a hauh vawi khatna a ni nghal bawk.

Luangmual tlangval Zela Chuau­ngo hian chart hmasa lama No.1 hauhtu Andrew K. Lalchhandama chu a khum a, H. Lalremruati chu pathumnaah a awm ve leh bawk.

Hlaphuah thiam

Music Domain Mizoram (MDM) ten Mizo hla inphuah siak an buatsaih ṭum khan Zela Chuaungo hian Pathian fakna hla bikah lawmman pakhatna a la a, a hla phuah chu 'Lunghlu' tih a ni.

He hla ngei mai hi music video siamin March thla khan a tichhuak a, ni tam pawh a liam hmain dinhmun sang berah a rawn inhlangkai a ni. He hla hi Mizo rilrem zawng tak niin, tun lai Pathian hla thlan hlawh ber a ni mek.

Zela hian hla phuah a thiam tluk zetin zai lam pawh a tithei fu mai a, a music video 'Lunghlu' pawh hian ngaihhlut a hlawh tak zet a ni. Music track hi JH Lungmuana siam sak a ni a, recording hi A-16 Recording Studio kutchhuak a ni thung.

Zalenna dar

Darlawn tlangval Andrew K. Lalchhandama hian 'Zalenna dar' tih hla hmangin chart-ah dinhmun sang ber a lo luah tawh a, tun ṭum­ah pawh pahnihna a hauh. Mizo Idol star Andrew hian he hla hi a hlawh­tlinpui tak zet a, chart-ah pawh hun eng emaw chen chu a lanzui a rinawm.

'Mawi tawp berin' singer H. Lalremruati chuan pathumna a hauh ve thung a, a hnuaiah hian Lalremruata Fanai leh Stacy VL Muanpuii te an awm. Stacy hian 'I rinawm ropuizia' tih hla hmangin dinhmun sang a luah zui zel a, rimawi khawvelah mi bik a nih zia hai rual a ni lo.

Mawitei Ralte chuan 'Lalpa min vengtu' tih hla hmangin parukna a hauh ve thung a, Sanga Renthlei leh Sawmtea ten an dawt. 'Lal Krista tuinung lui' tih hla mawi taka satu Lalrinfela Tlau leh Lalchhuansanga te chu top 10-ah an inhlangkai bawk.