Godzilla leh Kong-te'n Record an sual chhuak
Hripui len hnuah Box Office a nguai a, a muhil a ni ber mai. Wonder Woman 1984 leh Tenet hmangtein kaih thawha kaih harh tum ṭhin a lo ni tawh a, mahse beisei angin thil a thleng hlei thei lo. Kum 2020 chu Box Office a 'hot' tak tak thei lo. Kum a thar a, engruai a ang thei lo. Theatre-a movie en tura kal chakna a bo zo tawh niin mi tam tak chuan an ngaih laiin, Box Office ring chhungah Godzilla leh Kong-te an rawn lut a, beisei phak bakin mipuiin heng sakawlh pahnih insual hi an hlut ta a ni.
Hrilen hnua sum lalut tam ber record chu...
Naupang lam deuh lawm tura beisei Godzilla Vs Kong hian hripui len hnua North America Box Office-a sum lalut tam ber record a siam a, hripui len hnua film tlangzarh zingah chuan a sum lakluh pawh a tam fal rem rem hle.
Tlangzarh a nih niah khan ni khatah $maktaduai 9.6 lai a lalut nghal. Nikhat thil thua hetiang zat sum lalut thei film hi Box Office-ah an awm lohna a rei tawh hle a ni. Inrinniah phei kha chuan $mtd 12.5 lai a hmu chhuak a, ni nga chhungin $maktaduai 48.5 lai a lalut der mai.
--Kong nge i ṭan Godzilla?---
Khawvel ram danga a sum lakluh nen chuan $mtd $285.8 lai a lalut tawh a, an budget $mtd 200 chu an khum der tawh a ni. Hripui len hnuah hetianga ranga budget khum thei film hi a la awm lo hial mai thei!
Tun kar tawp liam ta ni thum chhung khan theatre 3,064-ah chhuah a ni a, $mtd 32.2 lai a lalut bawk a, theatre-a tlangzarh a nih rualin HBO Max lamah pawh dah chhuah nghal a ni a, hei vang hian Mizoram lamah pawh fiah ṭha takin kan en tawh hlawmin a rinawm a, ram dangah chuan Kong nge i ṭan Godzilla tih zawhna an inzawt nasa hle a, he film en tawhte chuan Zoram lamah pawh hian an inzawt ve ngeiin a rinawm.
Pahnihna The Unholy
Box Office-a pahnihna chu The Unholy a ni a, theatre 1,850 aṭangin $3,153,456 a lalut a, Godzilla Vs Kong sum lakluh nen chuan a sum lakluh hi a inthlau hle.
The Unholy hi 'horror' film a ni a, helam film ngaina leh hmuhawn titute tan chuan ngaihven chi tak tur a ni ang.
The Girl Who Believes in Miracles
Kar hmasa lama pakhatna Nobody chu pathumna a ni a, Raya and the Last Dragon chu sum lalut tam palina niin Tom and Jerry chu pangana a la ni phak.
Film thar The Girl Who Believes in Miracles chu parukna a ni. Hmeichhe naupang pakhat, Pathian thuchah sawituin rinna chuan tlang hial a sawn thei tih a sawi aṭanga Pathian hnena nasa taka ṭawngṭai, chumi hnua an kuaa thil mak danglam tak tak a thlen tak dan tarlanna film hi a en tawhte'n an fak hle a, a hmuhnawm hle ang tih pawh a rinawm.
March 2020 hnua film thawm nei ring zual chu
North America BoX Office bikah chuan Godzilla Vs. Kong dawtah hian Christopher Nolan-a film sawi hlawh tak, hrilen hnua budget sang tak film theatre-a an tlangzarh hmasak ber Tenet khan $mtd 20 a lalut a, Krismas present atana Warner Bros. in an tlangzarh Wonder Womand 1984 khan $,td 16.7 a lalut bawk.
Animation film The Croods 2 khan $mtd 14 .4 lalutin Tom and Jerry khan $mtd 14.1 a lalut thung a ni.