World Earth Day

Nimin kha World Earth Day a ni a, hemi pual hian Google pawhin doodle-ah environement lam hawi an tarlang. Google Doodle hi Kevin Laughlin kutchhuak niin, albatross, coastal redwood, paedophryne amauensis, Amazon water lily, coelacanth leh deep cave springtail te chu slideshow hmangin an tilang. Kevin Laughlin chuan, "Khawvela nungcha leh thil chitin reng mai hian pawimawhna an nei vek a, a zavai hian kan humhalh an ngai a ni," a ti. World Earth Day hi environment humhalh a pawimawh zia lantirna ni atan hman ṭhin a ni a, ram ṭhenkhat phei chuan an la urhsun hle. World Earth Day hi kum 1970 aṭang daih tawh khan hman ṭan niin, ram 190 chuangin kumtin April 22-ah an hmang ṭhin a ni. Hmun ṭhenkhatah chuan environment humhalh a pawimawh zia uar zawka au chhuahpuiin kawng zawhte huaihawt ṭhin a ni bawk.