Billboard Music Award-ah Madonna

Kum tina sem ṭhin Billboard Music Award chu May thla khian sem a ni leh dawn ta a, perform tur te hming pawh puan a ni tawh. Chung zingah chuan American singer ropui Madonna chu mipui ngaihven ber niin, Javier Rosas, Kany García, Luis Fonsi leh Marc Anthony te an perform dawn bawk.

Kum 60 mi Madonna inlan tur thu hi tun hnai khan puan a ni a, Colombian singer Maluma nen an perform dun dawn a ni. Maluma nen hian hla thar 'Medellín' an sa dawn a, nghahhlehawm tawh tak a ni. Tun hi kum eng emaw zat hnua a perform lehna hmasa ber tur a ni dawn a, fan te tan pawh a hlu zual dawn hle.

Madonna hian a studio album 14-na tur 'Madame X' a buaipui mek bawk a, music khawvelah hmuh tur a awm chho leh ṭan dawn a ni. A album thar tur hi June thla khian release a ni ang.

Billboard Music Award-ah hian - Jonas Brothers, BTS & Halsey, Kelly Clarkson, Lauren Daigle, Khalid, Panic! at the Disco leh Sam Smith te chu inlan tura tihchian an ni tawh a, Mariah Carey a la awm cheu bawk. Award hi May 1 khian MGM Grand Garden Arena-ah sem a ni dawn a, Kelly Clarkson chuan a host dawn a ni.