Easter Weekend-a sum lalut hnem ber Curse of La Llorona
Box Office-ah roreltu an inthlak a, Shazam! lehthalin Curse of La Llorona chuan sum lalut hnem ber dinhmun a luah.
He supernatural horror/mystery film hian tun Easter Weekend chhung khan $mtd 26.5 zet a lalut a, Shazam! hian a dawt a ni. Swedish film maker David Sandberg-a kutchhuak Shazam! hian kar hmasa khan $mtd 15.4 thawkchhuakin, tun weekend-ah khan $17.3 zet a lalut leh bawk.
Supernatural horror
Tun hnaiah film ngaihven hlawh tak Curse of La Llorona a rawn inlar a, rin ang ngeiin Box Office-ah a che ṭha nghal. Film star hriat hlawh tak pawh ni lem lo - Marisol Ramirez, Linda Cardellini leh Venezuelan actress leh model ni bawk Patricia Velásquez te channa hi American film director Michael Chaves kutchhuak niin, April 18 khan release a ni.
Box Office-a hun eng emaw chen ro lo rel tawh Shazam! nek chhuak turin harsatna a tawk lo a, a sum lakluh zat en erawh chuan a dinmun a him lo tih a lang.
Shazam! a hniam mawh
Fantasy/sci-fi film Shazam! hi April thla tir khan tlangzarh a ni a, a sum lakluh a tlahniam mawh hle. Easter Weekend-ah pawh rin phak bakin a che ṭha zui a, $mtd 17.3 zet a thawk chhuak leh a ni.
North America aṭanga a lakluh tawh zawng zawng hi $mtd 282 zet a tling tawh a, khawvel hmun dangah pawh a che ṭha hle. A sum lakluh tawh zawng zawng hi $tld 1 a chuang tawh avangin, American film star Zachary Levi leh Grace Fulton te channa hi a 'hit' lo tih phal chi rual a ni lo.
Hetih rual hian Avengers: Endgame a chhuah hnaih avangin, a boruak a zuih chhoh deuh a rinawm. Hollywood superstar rual - Chris Evans, Brie Larson leh Robert Downey, Jr. te channa Avengers: Endgame hi kumina film chhuak tur zingah chuan thawm nei lian ber a ni a, April 26 hian release a ni ang.
Tun ṭumah hian true story behchhana siam Breakthrough chu top 3-ah a inhlangkai a, a sum lakluh zat chu $mtd 11.1 a ni. American actress lar Brie Larson channa Captain Marvel chuan $mtd 9.1 lalutin palina a hauh a, Little chu pangna-ah a awm ve bawk.
Dumbo leh Pet Sematary te chu sum lalut tam zual zingah telin, Missing Link, Us leh beisei phak lo Hellboy te chu top 10-ah an lang bawk.
Box Office Top 10
1. The Curse of La Llorona - $mtd 26.5
2. Shazam! - $mtd 17.3
3. Breakthrough - $mtd 11.1
4. Captain Marvel - $mtd 9.1
5. Little - $mtd 8.4
6. Dumbo - $mtd 6.8
7. Pet Sematary - $mtd 4.8
8. Missing Link - $mtd 4.3
9. Us - $mtd 4.2
10. Hellboy - $mtd 3.8