NORAH April 26 zanah release a ni dawn ta

Leitlang Pictures kutchhuak Mizo film 'NORAH' chu April 26 hian Convention Center, Lunglei-ah release a ni dawn ta. Hemi zan hian premier show a awm nghal dawn a, zan dar 7:00-ah ṭan a ni ang.

Mizo film ngainatuten 'Norah' film siam a nih tirh aṭanga nghakhlel taka an lo thlir chu a takin a thleng dawn ta a, chanchin lawmawm tak a ni ngei ang. Film siamtute an phur a, a changtuten mipui hmaa pholan hlan an nghahhlelh tluk zetin mipui lam pawh en chakin an kur tawh a ni.

Norah hi Lunglei khawpuiah chhuah hmasak a ni dawn a, April 28 zanah Gov't High School ground, Chanmari-ah mipui nawlpui en theih turin show a ni ang. Hemi hnu hi chuan Aizawl lamah chhuah a ni ve tawh thung dawn a, April 30 zanah Vanapa Hall-ah official show pui tham tak buatsaih a ni dawn.

May 1 aṭangin Aizawl khawpui chhung leh Mizoram hmun hrang hrangah show hi kalpui a ni zui dawn a, veng tam tak chuan an book lawk tawh a ni. Norah hi YouTube lamah official trailer tihchhuah a lo ni tawh a, social media lamah pawh a darh nasa hle. He drama/romantic comedy film chhuak thar tur hi Mizo film-ah chuan en manhla ber tur te zinga mi a ni ngei ang.

Norah hi pawl leh mimal tan inhlawhna ṭha tak a ni a, booking pawh hawn mek zel niin, 9436702516-ah biak pawh theih reng a ni.

A kalphung
Mizo film industry-in hma a sawn a, tun hnaia chhuak ho phei chu zirtir nei ṭha tak tak te an ni hlawm. Norah pawh hi a story kalphung a ngaihnawm viau dawn a, Home Minister fanu duatsual chanchin hrang hrang hmuh tur a awm dawn a ni. Home Minister fanu hi an in aṭangin a tlanchhuak dawn a, a thil tawn hrang hrangte leh a inhmuhchhuah dan te tarlan a nih bakah - a tlanbona lama tlangval fel tak a tawn chhoh dan te pawh hmuh tur a awm dawn a ni.

Rilru khawih tak tur a ni dawn a, scene ṭhenkhatah nuihna tur a awm laiin - ṭhenkhatah chuan mittui titla thei tur scene te pawh hmuh tur a awm dawn a ni.