GOT star Max Von Sydow a thi

The Exorcist, Flash Gordon leh Game of Thrones star Max Von Sydow chu Pathianni khan kum 90 mi niin a thi.

Max Von Sydow hi Swedish a ni a, kum 1973-a tihchhuah, horror film lar tak The Exorcist-a Father Lankester Merrin lema chang kha a ni. Film hrang hrangah a chang hnem hle a, Star Wars: The Force Awakens-ah pawh a inlan. HBO series Game of Thrones-ah khan Three-eyed Raven-ah a chang bawk.

Oscar dawng thei tur pawhin nominee pahnih lai a hmu tawh nghe nghe a, a thi tih puan a nih hian uitu pawh a ngah hle. Kum 1951 khan actress Christina Inga Britta Olin nen an innei a, fa pahnih an nei hman. Kum 1979 khan inṭhenin kum 1997 khan Catherine Brelet nen an innei leh a ni. Hemi hnu hian France khua leh tui nihna a nei a, hemi vang hian Swedish mi a nihna hi a hloh a ngaih phah thung. A thih chhan hi tarlan a la ni lo.