Westside Runway Showdown-ah Escape Engmoia leh model rual an che dawn

Mizoram University Stu­dents' Council buatsaih NEXA Virthli Festival 2019 chu neih chhoh mek zel a ni a, vawiinah pawh chhunzawm a ni dawn. Vawiin bikah hian show hmuhnawm tak a awm dawn a, Westside Runway Showdown-ah Escape Engmoia leh model rual an che dawn a ni.

MZU festival-ah hian Runway Showdown hi ngaihhlut ber te zinga mi a ni ṭhin a, kuminah hian model chhe lo tak tak an inlan dawn avangin ngaihven a hlawh zual a ni. He show-ah hian college ṭhenkhat leh MZU-a Department hrang hrangte an inel dawn a, en manhla tur tak a ni. Theme tur hi 'As you like it' leh 'Disney' te a ni dawn a, a tawp khar nan Escape Engmoia spring summer 2019 collection phochhuah a ni ang.

Hetah hian Femina Miss India 2018-a 2nd runner up Shreya Rao chu a inlan dawn a, hmaih phal chi a ni lo. Ani bakah hian - Parmila Chhetri, Mary Khyriem leh Lily Darnei te an la inthehṭhil dawn cheu bawk.

Mipa lamah India Top Model 2018 winner Mahir Pandhi, Mister Punjab 17 Navleen leh Mister Garnier NE Pawan Chhetri te an inlan dawn bawk. Mizo model ṭha ber ber ten Escape Engmoia kutchhuak an inbel dawn a, mit leh beng a tlai dawn hle a ni.

Show hi Instagram lama lar tak @benryanl-a'n a host dawn a, Feli Fanai, Sangkimi Khiangte leh Kimkima te an zai dawn bawk. Mizo makeup artist lar ber ber Hlua Chhakchhuak (Style n Go) leh Mahlimi Hmar ten model te an chei dawn bawk a ni.