Grammy a fel hlel deuh em ni? The Weeknd a lungawi thei lo

Rimawi huangchhunga chawimawina khawvelin a ngaihhlut 2021 Grammy award nomination list chu tihchhuah ni tawhin category hrang hranga chawimawina dawng thei dinhmuna ding a hriat tawh. Chutihrual chuan tunlaia huhang ngah ber pawl The Weeknd hming a lang lo a, a vui hle a, social media lamah 'The Grammys remain corrupt' tia post siamin amah bakah a fan-te chuan industry kalphung langtlang tak hmuh an phu tih a sawi.

Super Bowl half-time show khawvelin a ngaihlu a, a hmun bakah TV leh internet kaltlanga thlirtu pawh maktaduai tel an ni ṭhin. Chutiang huna zaithiam inlan tur chu khawvelah pawh 'top' level thleng phak an ni tlangpui a, chutah chuan nakkumah The Weeknd hi a perform dawn. Artist satliah a ni lo.

Grammy nomination list-a a hming a lang miah lo hi amah mai bakah khawvelin mak a ti a, a awm hle. Rimawi khawvela 'Blinding Lights' hit zia leh a album 'After Hours' kumin chhunga a hralh hnem zia thlir chuan nomination eng emaw zat hmuh chu phu hlein a inhria a, mahse a hming hmuh tur reng reng a awm lo.

 Variety-in hnawl a nih chhan an hria!

Variety chuan the Weeknd hi Grammy committee-in an hnawl chhan a tarlang a, an thudawnna erawh chiang takin a tarlang lo.

An thulaknain a sawi dan chuan khawvel mipui mai bakah The Weeknd-a team-te leh Grammy organizer-te chuan nakkum Grammy-a nomination hmu tam ber tur zingah a tel an beisei bakah Grammy ceremony-a perform tur pawhin biak lawk a ni. Mahse Grammy ceremony hnu kara  Super Bowl halftime-a a perform dawn vangin an inbiakna chu a fuh hleithei lo a, mahse show lian pahnihah hian perform ve ve tur erawh chuan an inbe fel tho a; chutih mek lai chuan Thawhlehni tuk a zing tho chuan nomination list-ah a hming a hmu ta lo a ni.

The Weeknd chuan social media-ah kar eng emaw zat sawm a nih lohna show-a perform turin a inbuatsaih thu leh nomination hmuh loh chu tel tura insawm lohna nia a ngaih thu a ziak bawk.

“Collaboratively planning a performance for weeks to not being invited? In my opinion zero nominations = you’re not invited!” tiin.

Recording Academy chief Harvey Mason, jr chuan The Weeknd phunna chu chhang nghalin amah ngei pawhin nomination list-ah The Weeknd hming a awm lo chu mak a ti hle tih leh January 31-a Grammy award sem hunah pawh perform tura beisei a nih thu a sawi.

Grammy nominee-te a lawmpui thu a sawi rualin Super Bowl-a a perform dawn tih an hriat chuan an phur thu leh Grammy stage-ah pawh perform ngei tura an duh thu a sawi a ni. Kumtinin chawimawina dawn phu artist an tam ang huin nomination an tam ngai lo hrim hrim tih leh category zawng zawnga vote lakna chu Super Bowl-a The Weeknd a perform dawn tih hriat a nih hmaa tihfel a nih tawh avangin Super Bowl-a  perform tur chuan nghawng a nei thei lo hrim hrim a ni, a ti.

Grammy nomination-a category pali laia nomination hmu Justin Bieber chuan Instagram lamah R&B-ah ni loa Pop category-ah zawk nominate a ni chu a sawisel a, 'Changes' album pawh chu R&B album a nih thu a sawi.

Bieber hian Best Pop Solo Performance (Yummy vangin), Best Pop Duo/Group Performance (Quavo nena an sak dun Intentions vangin), Best Pop Vocal Album, leh Best Country Duo/Group Performance(Dan + Shay a thawhpuina 10,000 Hours vangin)-ahte nomination a hmu a ni.