TikTok khapna sut leh

Chinese social media video-sharing application 'TikTok' chu khapna thupek tihchhuah a nih zet hnuah, Nilaini khan court chuan sut leh a nih thu a puang.

Court chuan 'TikTok' khapna hi sut ni mah se video thehdarh kawngah khauh taka dan lekkawh a nih tur thu a tarlang. Justice N. Kirubakaran leh S.S. Sundar te chuan thupek hi tichhuakin, dan zawm lote chungah hremna pek a nih tur thu an tarlang.

Madras High Court chuan April thla tir lam khan TikTok khapna hi a lo tichhuak tawh a, he application hmang hian mipat hmeichhiatna lam hawi video a darh nasa hle tih an sawi. Khapna thupek tihchhuah a nih chungchangah hian he application siam chhuaktu Chinese company Byte­Dance chu Supreme Court-ah zualkoin, khapna hi sut a ni leh ta a ni. Supreme Court hian Tamil Nadu High Court chinfel turin a hlanchhawng a, Nilaini khan thutlukna hi siam fel a ni ta a ni.

Video siamna ap­pli­cation TikTok hi Byte­Dance chuan kum 2016 khan an launch a, khawvel hmun hrang hrangah a lar chak hle. India ramah pawh mi maktaduai 120 vel zetin an hmang tawh a, a hmangtu tam zawk hi ṭhalai an ni. He application hmang hian awlsam takin video a siam theih avangin mi tam takin a ṭha lo zawngin an hmang a, Bangladesh-ah pawh khap a lo ni tawh bawk.