Priyanka Chopra thlaktu tur Katrina Kaif

Bollywood star Katrina Kaif chu infiam mi ropui PT Usha chanchin tarlanna film-ah a chang dawn a, Priyanka Chopra hmunruak a luah dawn a ni.

PT Usha biopic-ah hian Pri­yanka hi inlan tura beisei a ni a, amah­erawh chu a inlan leh thei dawn lo a - a thlak nan Katrina Kaif hi an be fel tawh niin an tarlang.

Infiammi ropui PT Usha film hi Tamil film director Revathy S Varma chuan a siam dawn a, Katrina Kaif hi PT Usha lemah a chang dawn a ni. A tirah chuan Priyanka hi inlan tura tih a ni a, a theih leh dawn tak loh avangin Katrina Kaif hming an lam ri leh ta a ni. Kum 35 mi Katrina Kaif hian 'Bharat' filmah Priyanka Chopra a lo thlak tawh bawk.

English actress Katrina hi Hindi film-ah a inlan tam avangin Bollywood-ah hriat a hlawh hle a, film chang tura sawmna pawh a dawng hnem hle. Amah hi Hong Kong-a piang niin, an chhungkua hi London-a an pem hmain ram eng emaw zatah an lo khawsa tawh ṭhin.

Hriat ngai loh lanu!
Indian filmmaker Kaizad Gustad chuan London fashion show-ah hmu fuhin, a film siam 'Boom'-ah chang turin a sawm a - heta ṭang hian Bollywood-ah a hming a chher chho ta a ni. Boom hi 2003 khan tihchhuah niin a hlawhtling hle a, Katrina Kaif tan phei chuan a rahbi pawimawh tak a ni. Amaherawhchu duhthusama Hindi a hman theih loh avangin har­satna a tawk a - Malliswari (2004), Maine Pyaar Kyun Kiya (2005) leh Namastey London (2007) te a chan zawh hnuah erawh Bollywood industry-a mi hlawh­tling ber te zinga mi a lo ni ta a ni.