'Zolitics Indian Polity and Governance' tlangzarh a ni
Lalduhthlana lehkhabu ziah, 'Zolitics Indian Polity and Governance (India Sorkar Kalphung)' chu nimin khan Home Minister Lalchamliana'n Chaltlang Tourist Lodge-ah a tlangzarh.
Home Minister Lalchamliana chuan Mizo ṭhalai ngeiin hetiang lehkhabu ṭha a buatsaih thei hi lawmawm a tih thu sawiin, Mizo ṭhalai dangte tan pawh entawn tur tak a nih bakah an hman ṭangkai tur tak lehkhabu a nih thu a sawi. Lalchamliana hi a lehkhazir laia Political Science-a Gold Medalist hial lo ni tawh a ni nghe nghe.
'Zolitics Indian Polity and Governance India Sorkar Kalphung)' lehkhabu hi Indian polity lehkhabu, Mizo ṭawnga tihchhuah hmasak ber a ni a, competitve exam hrang hrang bei mekte leh beih tumte tan pawha ṭangkai tak tur a ni a, Rs 400 man a ni ang.
Tlangzarh inkhawm hi Mizoram Football Association (MFA) Honorary Secretary Lalnghinglova Hmar-in a kaihruai a, Bethel Ministry speaker Frederick Lalrindika chuan hunserh hmangin Govt. Johnson College Asst. Professor Ruatdiki Hmar chuan lehkhabu review-na a nei a ni.
Ruatdiki Hmar chuan a lehkhabu tlangzarh chu Mizo ṭawnga la awm ngai lo leh zirlaite pawhin an mamawh tak a nih thu sawiin, zirtirtu a nih angin zirlaite a zirtirna kawngah pawh a hman ṭangkai tak tur lehkhabu a ni, a ti.
Phek 552-a chhah a nih thu leh a lehkhabu tawpa appendix leh a source mumal taka a dah chu a fak hle a, Combine Exam 2015 aṭanga 2018 question solve sa a dah chu ṭha a tih thu sawi bawkin exam pek tumte tan pawha lehkhabu ṭangkai tak tur a nih thu a sawi a ni.
Lehkabu buatsaihtu, Lalduhthlana hi kum 20 mi a ni a, Delhi University-a BA zirlai a ni. Hetiang lehkhabu a buatsaihna chhan hi Lalduhthlana chuan sawiin, hunawl a ngah vanga buatsaih a nih loh thu leh Mizo ṭawnga hetiang lehkhabu an la neih loh avanga a ṭhahnemngaihna a nih bakah a ṭhalaipuite'n an hman ṭangkai theih a beisei vanga buatsaih a nih thu a sawi.
'Zolitics Indian Polity and Governance' lehkhabu hi lei duh tan chuan Lalduhthlana Instagram page 'Zolitics' lamah ngaihven theih a ni.