Lelte Award 2019 Singer of the Year Kimkima
Lelte Award vawi 28-na chu kar kalta Inrinni zan khan Vanapa Hall-ah sem a ni a, lengzem singer Kimkima chu Singer of the Year (Male) atan thlan a ni. Kimkima hian Song of The Year a dawng bawk a, Lengzem huangah chuan mimala langsar ber a ni.
Gospel huangah Durtlang nula Lalduhsaki chu Singer of the Year (Female) atan thlan a ni a, mipa lamah Andrew Laltlankima chuan he chawimawina hi a dawng a ni.
Song of The Year
Ṭhazual Award 2018-a Best Male Artist Lengzem dawngtu Kimkima chuan Lelte Award-ah pawh ropuina a chang leh ta a, a hla thulkhung 'I zun ngaih lunglen vangin' tih hla chu Song of The Year a tan thlan a ni. He hla hian Zoram dung leh vang a dengchhuak a, Song of The Year hi a phu hle a ni.
Tunlai lengzem singer zinga boruak nei lian ber te zinga mi Kimkima hian tun hnaiah hlawhtlinna a chang mawlh mawlh a, award pawh a dawng nual tawh. Lengzem Singer of The Year atana thlan hi a phu hle a, mipuiin a zai an ngaina tak zet a ni.
Zorinzuali Khiangte
Hmeichhe lamah Zorinzuali Khiangte chu Singer of The Year (Lengzem) atan thlan a ni a, ani pawh hian a phu hle. A music video ten ngaihhlut an hlawh ṭhin a, thla thar maia tihchhuah turin music video puitham tak a peihfel leh tawh bawk.
Feli Fanai chuan Music Video of the Year a la ve thung a, 'Tuman an tluk lo' tih chu music video ṭha ber atan thlan a ni. Hetihlai hian C. Lalzahngoa chu New Artist of the Year (Male) atan thlan a ni a, a vawi khat nan Lelte Award a dawng.
Musician zingah Thangbawiha a langsar a, Musician of the Year award hlan a ni. Mizoram chhung leh state pawn thlenga hlawhtlinna lo chang tawh Avora Records te chu Band of the Year atan thlan an ni bawk.
Sailova a inlar
Lengzem/lenglawng hla a sak lai pawha hlawhtlinna tam tak lo chang tawh a ni a, Gospel huangah pawh mi bik a nih zia hai rual a ni lo. Vanlalsailova hian 'Thinlung a thlîr zawk ṭhin e' tih hla hmangin Music Video of the Year a la a, award hlu tak a hum haw a ni.
Choir of the Year atan Thlarau Bo Zawngtute (TBZ) te thlan an ni a, New Artist of the Year (Female) chu Mizo Idol star H. Lalremruati (Mâruati) a ni. One in Christ te chuan Best Group/Duo of the Year an dawng ve leh bawk.
Kima Chhangte
Mizo music industry tana thawh hlawk em em mai Kima Chhangte chuan Song Writer of the Year chawimawina a dawng a, a hnathawh zozai hmuh hmaih chi a ni lo. Traditional Singer of the Year atan Lalbiakhluni Colney thlan niin, Mizo Dance Camp ten Entertainer of the Year an la thung.
Weightlifter Jeremy Lalrinnunga kutah Young Achiever of the Year hlan niin, Writer of the Year atan C.T Lalrinawma thlan a ni a - David Rualthankhuma hnenah Lifetime Achievement Award hlan a ni bawk.
Lelte Award-ah hian Special Award siam a ni bawk a, mi 11 hnenah hlan a ni.
Lelte Award 2019 Winner
Gospel
Gospel Singer of the Year (Male)
• Andrew Laltlankima
Music Video of the Year
• Vanlalsailova (Thinlung a thlîr zawk ṭhin e)
Gospel Singer of the Year (Female)
• Lalduhsaki
Choir of the Year
• Thlarau Bo Zawngtute (TBZ)
New Artist of the Year
• H. Lalremruati (Mâruati)
Best Group/Duo of the Year
• One in Christ
Pavalai Music Video of the Year
• Durtlang Kohhran Pavalai Zaipawl
Lengzem/Lenglawng
Singer of the Year (Female)
• Zorinzuali Khiangte
Singer of the Year (Male)
• Kim Kima
New Artist of the Year
• C. Lalzahngoa
Music Video of the Year
• Tuman an tluk lo – Feli Fanai
Musician of the Year
• Thangbawiha
Song of the Year
• Kim kima – I zun ngaih lunglen
Band of the Year
• Avora Records
Traditional Singer of the Year
• Lalbiakhluni Colney
Other
Song Writer of the Year
• Kima Chhangte
Entertainer of the Year 2019
• Mizo Dance Camp
Young Achiever of the Year 2019
• Jeremy Lalrinnunga (weightlifter)
Article/Reporter/Writer of the Year
• C.T Lalrinawma
Lifetime Achievement Award
• David Rualthankhuma