Mizo film chhuak thar tur RAMADA (The Detective Mart - 2)

Tun hnaiah Mizo film thar 'Norah' chu tlangzarh a ni a, detective lam hawi film chhuak thar tur a awm leh dawn. RAMADA(The Detective Mart - 2) tih chu shooting neih mek a ni a, 80% vel zawh a ni tawh.

He film hi social activist, Ramada-i'n RTI Act hmanga sorkar department hrang hranga document dil kual a, sorkar hmalakna dik lo leh eiruknate media kaltlanga mipuite thudik a hrilh hriat dan chanchin tarlanna a ni.

Minister aṭanga department lam hruaitute mai bakah, induhsakna avanga police lama lut officer ṭhenkhat ten inthuruala Ramada-i thil tih ṭhin chu chhunzawm lo tura an ngen hnu pawh a, a zawm duh loh avanga rukbo a nih dan te chu enchakawm tak a ni.

Ramada-i rukbo a nih avanga police lamah FIR thehluh a nih dan leh, chhuina mumal a awm loh vanga Ramada-i pa mangangin Detective Mart leh a thawhpuite ṭanpuina a ngen chhoh dan te pawh hmuh tur a awm dawn a ni.

He film-ah hian ram rorelna dik lo ṭhenkhat tih lan leh sawi lan a ni zauh zauh dawn a, unit level aṭanga minister thlenga thil kal kual dan leh, Department head mai bakah contractor thlenga an in share kual dante tihlan a ni dawn bawk.

A changtute
RAMADA film-ah hian Detective Mart-a lo inlan tawh Lalruatfela kan hmu leh dawn a, Comedian Search pakhatna Lalsiamthara bakah Champhai Chapchar Kut Miss Vanlaldiki te an inlan dawn bawk. Ramada-i lemah hian MLA election-a Zoramthar candidate Lalruatfeli chu a chang dawn a, en chakawm tawh tak a ni.

RAMADA hi M&J videoproduction produce a ni dawn a, KC Visual Inc nen an thawk dun a ni. Shooting hi zawh fel thuai beisei a ni a, release hun tur tak erawh hriat a la ni lo.