James Bond film-ah Malek

Bohemian Rhapsody star Rami Malek chu James Bond film chhuak thar leh turah a inlan dawn a, Cuban actress Ana de Armas chu Bond Girl tur a ni ang. Rami Malek leh Ana de Armas te hi Daniel Craig te nen an changho dawn a ni a, en chakawm tawh tak a ni.

Nakkum April thla-a tihchhuah tur James Bond film chhuak thar tur hi a title puanzar a la ni lo a, a changtu tur pawh an la awm belh zel. American actor Rami Malek inlan tur thu hi tun hnai khan puan a ni a, Ana de Armas bakah Dali Benssalah, David Dencik, Lashana Lynch leh Billy Magnussen te chu an inlan dawn bawk.

Director Cary Fuku­naga chuan Ralph Fiennes, Naomie Harris leh Maxim cover model Léa Seydoux te chu an inlan dawn tih a sawi a, Ben Whishaw, Jeffrey Wright leh Rory Kinnear te inlan tur thu a nemnghet tawh bawk. Ngaihven hlawh ber erawh Ana de Armas a ni a, Bond Girl thar tur hian thawm a nei lian hle a ni.

Shooting hi neih chhoh ṭan a ni a, Carib­bean Island lamah bul ṭan a ni. Norway, London leh Italy lamah pawh shooting hi neih a ni dawn bawk. Bond 25 hi April 8, 2020-ah release tura ruahman a ni.