Rolling Stone India 10 Best Indian Singles of 2019-ah Mood Station 'Rawn Sapatal Rawh'

Rolling Stone India-in nikum chhunga ramchhung hmun hrang hranga single tihchhuah ṭhazual 10 a thlanchhuah zingah Mizo rock/metal band Mood Station hla 'Rawn Sapatal Rawh' chu a tel.

Mood Station hi SEKI  intervillage  band contest 2019-ah khan Ramhlun South 1 aiawhin an tel a, pakhatna an ni nghe nghe. Kha band contest-ah khan 'Rawn Sapatal Rawh' hi an chet ṭhatpui hle a, pakhatna an nih lawmna pualin music video an tichhuak a ni.

Rolling Stone India hian a ṭhat dan indawtin list hi an tichhuak chuang lo a, single ṭhazual 10 an thlangchhuak tawp a, chung zingah chuan 'Rawn Sapatal Rawh' hi a lang phak. 2006 khan Magdalene kha album hralh ṭhaah an thlang tawh a, single bikah hiah chuan Modd Mizo zingah Mood Station hi top 10-a lang thei hmasa ber an ni hialin a rinawm. Mizo hla bikah phei chuan a hmasa ber an ni tih a chiang a, heihi a hlut zualna a ni. India rama hnam hetiang zat awm zinga hnam tlem ber zinga mi Mizo hla ngei mai Rock Magazine lar ber zinga miin hla ṭha 10 a thlanchhuah zingah 'Rawn Sapatal Rawh' a lang thei hi thil namai lo tak a ni.  

'Rawn Sapatal Rawh' phuahtu, Mood Station vocalist Vanlalṭanpuia (Ṭpa) chuan Rolling Stone lamin an thlan chhuah zinga an tel dan hi an hriat bik loh thu sawiin, "Rolling Stone hi promoter ang an ni mai ang chu, promote ngai kan nih avang a nih ka ring ber," tiin Vanglaini a hrilh. "Mizo hla kher an rawn thlang chat hi Mizo a hmasa ber kan nih phei chuan kan lawmna ber pawh a ni ang," tiin a sawi bawk.