Ṭhazual Lengzem-ah Awmtea Polymer a inlar
'A rem tawh lo' tih hla mawi tak satu, Awmtea Polymer chuan Fela Colney nek chhuakin Ṭhazual Lengzem chart-ah dinhmun sang ber a luah.
Fela Colney hian chart hmasa lamah khan 'Sensiari' tih hla hmangin No.1 a lo hauh tawh a, tun ṭumah erawh pahnihna a luah ve thung a ni. Temami, Jonathan Lalengzauva leh Mami Varte te chu top 5-ah an lang.
Awmtea Polymer music video ten belhchian an dawl viau zel a, 'A rem tawh lo' pawh hian mit leh beng a titlai hle. He hla hi Angty Tuallawt nena an phuah niin, a awm nen pawh a inmil a - a sa nalh hle a ni. Mipuiin a zai ngaihthlak an la kham lo tih a lang a, thlangtu ngah ber a ni. A music video-ah hian film star Gospela Tlau pawh hmuh tur a awm a, model ten an zir bawka YouTube-ah pawh viewer an pung chak hle a ni.
Fela Colney chuan a dinhmun ngai luah zo lo mah se pahnihna-ah a inhamtang a, 'Sensiari' a hlawhtlinpui zui zel. Temami chuan 'In tello chuan' tih hla hmangin pathumna a hauh ve thung a, Mizo Idol star Jonathan Lalengzauva a inlar ve leh bawk. Jonathana hian 'Ka riang ngei e' tih hla hmangin No.1 a lo hauh tawh a, a hla thulkhung hmang hian a sang zual zingah a la tel zui zel a ni.
Mami Varte chu a hla phuah 'Duhaisam' hmangin top 5-ah a inhlangkai a, Fakmawia Fanai chu parukna a ni. Ṭhazual chart-a mikhual lo tak HT Lalthanzami leh Jenny Jathang te an inlar leh ve leh tawh bawk.
HT Lalthanzami hian 'Hlimte'n leng ang che' tih hla hmangin pasarihna a luah a, Jenny Jathang pawhin 'Nang nen' tih hla hmangin pariatna a hauh a ni.
Top 10-ah hian F. Zomuanpuia a lang ve leh bawk a, a hla thar 'Satel lem' chuan thlan a hlawh zui zel. Chutih rual chuan a hnungtawlh zawngin a kal ve thung a, chart hmasa lamah khan parukna luahin tun ṭumah erawh pakuana a ni. Chama chu 'Khawiah nge I tuan le' tih hla hmangin dinhmun sangah a inhlangkai ve bawk.
