MDM-in an kum 10 tlin lawmna nei dawn

Music Domain Mizoram (MDM) chuan April 10, Inrinni hian an kum 10 tlin lawmna SIBYFARMS World Bank Road, Salem Vengah an nei dawn.

MDM kum 10 tlin ni tak chu April 1 kha a ni a, mahse a lawmna hi tun Inrinni lo awm turah hian an nei dawn a ni. He hunah hian R. Hmingthanzuala, Director, Art & Culture Department chu Khuallian a ni dawn a, zaithiam C. Vanlalmalsawma (Sawmtea), MDM Vice President ni bawk chu host a ni ang.

Tlai lam dar 2-ah Assembly rorel inkhawm an nei phawt dawn a, tlaiah MDM member zawng zawng tan ruai buatsaih a nih dawn bakah zan lamah concert pui tham tak an buatsaih dawn bawk a ni. House band an awm ang a, MDM leh Mizoram Rimawi khawvel a sulsute pawimawh tak takte chawimawina hun hman a ni dawn bawk.

MDM hian an programme hman tur atan hian an tlai phalh thulhah tiin DC hnenah phalna an la lawksa vek bawk a, member kal turte chu Covid-19 laka invenna tur sorkarin a tihchhuahte ṭha taka zawm tura inchahin MDM member-te chu kim taka kal turin an insawm a ni.

Music Video thar
MDM hian an kum 10 tlin lawmnaah hian Music Video thar an tlangzarh dawn a, MDM Reach out tih hmingin MDM artist 22 lai he music video-ah hian an inlan dawn a ni.

An hla tihchhuah tur hi 'Riangvai Fate' tih a ni dawn a, Khuallian R. Hmingthanzuala chuan a tlangzarh ang. He music video hi mi harsate ṭanpuina pual liau liau tur a ni a, video kaltlanga an sum lakluh zawng zawng chu ṭanpui ngaite tan an pe vek dawn a ni.