Cardi B kan hmu rih dawn lo?

Rapper Cardi B chuan hun eng emaw chen chu a inkhung bo hrih dawn tih a sawi mauh mai! Inkhung bo rih a tum chhan erawh a fan-te tan chuan thu lawmawm tak a ni ngei ang. A studio album pahnihna tur ṭha taka zawh fel a duh avangin hun eng emaw chen chu a bo rih dawn tih a sawi.

'WAP' rapper chuan kum 2018-a a tlangzarh a album hit tak mai 'Invasion of Privacy' chhunzawmna tur a buaipui lai mek chu hripui leng vangin rei tak a chawlhsan tawh tih a sawi a, XXL magazine-in an kawmnaah hemi chungchang hi sawiin, nikum chhung khan kuminah hi chuan album tihchhuah hman ngei a tum laiin Covid-19 a len tak avangin a buaipui chhunzawm thei ta si lo a; chumi avang chuan a album zo fel tura bo rih a tum ta a ni.

Cardi B hian a album hmasa ber 'Invasion of Privacy' kha Billboard 200 chart-ah topper a nihpui nghal a, streaming record eng emaw zat a siam bakah RIAA chuan triple platinum-ah a puang hial tawh a; Grammy award hial pawh a dawnpui tawh a nih kha. Tuna a album thar buaipui mek pawh hi a hit leh viau turah ngai ang.