Ed Sheeran leh Cherry an innei?

Bristish singer chhuanvawr Ed Sheeran leh British consul­tant Cherry Seaborn-te chu a rukin an inkutsuih niin khaw­thlang media-te chuan an tarlang.

Media-te chuan Ed Shee­ran leh Cherry-te hi nikum December thla khan Suffolk, East England-ah an innei a, an ṭhian ṭhate pawh an sawm lo niin an sawi. Hemi chungchang hi tun hnaiah khan a rawn irhchhuak chauh a, mipui pawh a ti hrilhhai hle a ni.

Khawvela popstar lar berte zinga miin a ruk thei ang bera nupui a lo nei mai hian mak tih a hlawh a, hun eng emaw chen puan­chhuah loha a awm bawk avangin fans lam pawh an lawm vak lo a ni.

An inneih ceremony-ah hian mi 40 vel chauh an tel niin an sawi a, chung zingah chuan a ṭhian ṭha tak Taylor Swift bakah record company executive leh mi challang dangte pawh hmuh tur pakhat mah an awm lo a ni.

Kum 28 mi Ed Sheeran leh Cherry (26- te hi hun rei tak an lo inzui tawh a, naupan lai aṭanga school lo kal dun tawh ṭhin a ni. Hun rei tak ṭhian angin in en mah se a tawpah chuan hmangaihna lipui-ah an zuanglut ta nge nge a, kum 2015 khan an in date thu an puang a ni.

'Perfect' singer Sheeran leh tuna a nupui ni ta nia sawi Cherry-te hi nikum January thla khan an inhual thu an lo puang tawh a, Cherry pawhin an inhualna zungbun hi Instagram lamah a tarlang a nih kha. Hemi ṭum hian Ed Sheeran chuan, "Cherry hi ka hmangaih a, ka kianga awm turin ka duh a ni," tiin a lo sawi tawh a, a takin an thleng ta a ni ngei ang.