Selena khumtu Ariana Grande
'Queen of Instagram' an tih mai Selena Gomez chuan a lal ram chuh buaitu dang a tawng leh ta a, follower neih tam lamah American singer Ariana Grande chuan a lehpel. Hemi hma hian football star Cristiano Ronaldo chuan nikum October thla khan a lo khum tawh bawk a ni.
Ariana Grande hian February 25 khan Selena hi a khum a, follower 146,286,173 zet a nei a ni. Hetih lai hian an inthlauhna erawh a tam lo hle a, Selena Gomez hian 146,267,801 zet a la nei a ni. Selena hian tun hnaiah a account a deactivate fo a, hei hian nghawng a nei ta ni pawhin a lang. Nikum September khan a account hi a lo titawp lailawk tawh a, kumin January thla khan a activate leh chauh a ni.
Hetih rual hian Ariana Grande hi tun hnaiah a lar zual a, music industry-a a hlawhtlinna chu kawng dangah pawh a lang chhuak ta a ni. 'Thank U, Next' singer hian IG lamah hian tun hnaiah follower maktaduai 13 vel zet a neih belh a, hmeichhe zinga follower ngah ber a ni ta a ni.
Instagram-a follower ngah ber chu Cristiano Ronaldo niin, follower maktaduai 156 zet a nei. Ariana Grande chuan mtd 146.28 neiin, Selena hian mtd 146.26 a nei thung a ni.