Shakira Spanish Court-ah inlan dawn

Colombian singer lar Shakira chu chhiah awl ruk thubuaiah Spanish Court-ah a inlan a ngai dawn. Spain sorkar chuan 'Hips Don't Lie' hitmaker hian kum 2012-2014 chhung khan chhiah $mtd 16.4 zet a awl ru niin an puh a, hei vang hian June thla hian court-ah insawifiah tura hriattir a ni.

Shakira hi a kawppui Barcelona star Gerard Pique bakah an fate pahnih nen Spain-ah hian hun eng emaw chen an khawsa a, hemi chhunga chhiah an chawi tur hi an pe lo niin Spain authority-te chuan nikum December thla khan an lo puang tawh a ni. Chhiah an pek loh zat pawh tarlangin, $mtd 16.4 zet a tling a ni.

Spain-ah hian kum khat chhunga ni 183 khawsa-te chu chhiah pek tir ṭhin an nih avangin Shakira pawh hian chhiah hi a pek ngei a ngai dawn niin a lang. Hemi chungchangah hian Court chuan tun hnai khan thuchhuah a siam a, Colombian singer hi June 12-ah inlan turin a hriattir ta a ni.

Shakira bakah hian footballer lar Lionel Messi leh Cristiano Ronaldo-te chuan chhiah awl ruk chungchangah hian thubuai an lo awrh tawh bawk a ni.