Forbes’ 35th Annual World’s Billionaires List Jeff Bezos bawk

Forbes’ chuan kumtina an tihchhuah ṭhin angin Thawhlehni khan Forbes’ 35th Annual World’s Billionaires List an tichhuak leh a, an list tarlanah chuan Jeff Bezos bawk a hmasa berah a awm leh. Hmanni lawka Bezos rawn lehpel zuaitu Elon Musk chu pahnihnaah awm thungin Louis Vuitton hotupa Bernard Arnault chu pathumna a ni.

Forbes’ 35th Annual World’s Billionaires List-ah chuan hming 2,755 lai tarlan a ni a, kum hmasa lama an list tihchhuah aiin mi 660 laiin an tam zawk! Billionaire list an tarlante hausak zawng belhkhawm chu $trillion 13.1 tehmeuh a ni a, nikum lamah kha chuan $trillion 8 niin $trillion 5-in a tam tawh zawk! Covid-19-in mihausa ho sum lakluhna a nghawng ve meuh lo tih hei hian a tilang chiang hle.

Kumin Forbes billionaire list-ah hian mi thar 493 an awm a, darkar 17 danah billionaire thar an awm zel ang a ni!

Ram hrang hranga billionaire awm zat chu...

Forbes list tihchhuah zingah hian China leh Hong Kong aṭangin mi 210 lai an tel a, US aṭangin mi 98 an tel bawk. Billionaire list-a hming lang thar zinga hausa ber chu Nevada lam mi Miriam Adelson niin $tluklehdingawn 38.2 a nei anga chhut a ni.

US chu billionaire ngah ber an la ni zel tho a, 724 lai an awm. China chuan dawtin 698 an awm thung. China khawpui Beijing chu billionaire awm tamna ber khua a ni ta a, New York City a khum ta a ni. India chu billionaire awm tamna ram pathumna niin 140 lai an awm ve bawk. German-ah 136 an awm a, Russia-ah chuan 117 an awm a ni.

Kum 40 hnuai lamah
Billionaire list thar berah hian kum 40 hnuai 106 an awm a, chung zinga hmun thuma ṭhena hmun hnih lai chu 'self-made billionaire' an ni nghe nghe. Kum 26 mi American Austin Russell chu 'self-made billionaire' naupang ber a ni.

Germany mi Kevin David Lehmann chu a naupang ber a, kum 18 lek a ni! Billionaire upa ber chu US insurance tycoon George Joseph kha niin kum 99 a ni tawh.

Khawnge Jack Ma?
Asia rama mi hausa ber ni ṭhin, Jack Ma chu 26-naah a tlahniam a, nikum lamah kha chuan 17-na a ni a, kuminah hian khumtu an tam ta deuh a ni.

India mi hausa Mukesh Ambani chu Asia rama mi hausa ber niin, khawvelah chuan 10-na a ni thung.