Zonet show thar tur Escape With Us

Mizo zinga designer lar ber pawl, Feli Fanai leh milar hrang hrangin a thawmhnaw design an inbel ṭhin, Escape Engmawia chuan zanin aṭangin Zonet-ah show a nei ṭan dawn a, a show hming chu 'Escape With Us' tih a ni ang.

'Escape With Us' hi thla khatah episode pahnih tihchhuah ṭhin a ni dawn a, zanin dar 8-ah hian Zonet Zawlbukah episode hmasa ber 'Styling with differently able star' chu en theihin a awm dawn a, hetah hian Mawimawii, Locomotor ni chung a LLB zo thei nen hun an hmang dawn a ni.

Escape Engmawia reality show thar tur hi entertainment show a nih angin zirtir nei a ni kher dawn lem lo a, Mizote'n kan la hmuh ngai lutuk loh lifestyle episode hrang hrang a awm dawn bawk. 'Keeping up with the Kardashian' hit ziate pawh kan hria a, chutiang lam rawng kai deuh show-te pawh 'Escape With Us'-ah hian kan hmu dawn a nih hmel.

He show season hmasa ber hi Food and Civil Supply Department-in an sponsor dawn a, TV lama en hman lo tan pawh YouTube lamah en tur a awm thuai dawn.