Selena Gomez-i'n Studio a luhchilh leh ta

Harsatna eng eng emawin a tlakbuak ve reng avangin music khawvelah pawh a thawm hriat tur a tam lo a, a rilru leh taksa pawh a inpeih tawk lo. Tunah erawh American singer Selena Gomez hian recording studio a luhchilh leh tawh a, hla thar kan hmu thuai a nih pawhin a mak lo ang.

Selena hi tun hnai khan Los Angeles-a recording studio pakhatah hmuh a ni a, hei hian fans lam pawha tiphur hle a ni. 'Back To You' singer hian hemi chungchang hi Instagram lamah a tarlang zui a, thu tam erawh a sawi lo. Heti chung hian fan-te an phur hle a, American singer lakah hian beiseina an nei sang hle a ni.

Selena Gomez hian recording studio a luhchilh chungchang hi a la sawi thui duh rih vak lo a, hla thar a buaipui leh buaipui loh chungchang pawh a la tarlang rih lo a ni.

Hetih rual hian 'Wolves' Selena hian ama pualin hla thar tichhuak lo mah se, thawhpui erawh a nei nual. Benny Blanco, Tainy leh J Balvin te nen an thawk ho a, Julia Michaels nen 'Anxiety' an tichhuak bawk. 'Anxiety' hi January thla khan tihchhuah niin, a hit hle a ni.

American singer Julia Michaels hian January 25 khan 'Inner Monologue Part I' album a tichhuak a, Selena leh Niall Horan-te a thawhpui a ni.

Harsatna kara leng
Kum 26 mi American pop singer hian rilru leh taksa lama harsatna a tawh avangin nikum khan enkawlna hrang hrang a dawng nual a, amah pawh a chaurau hman hle niin khawthlang media te chuan an tarlang. Ṭum eng awmzat Hospital-ah a lut a, a kal pawh thlak sak a ni.

Hemi hnu hian a rilru lamah harsatna a tawk zui a, hun eng emaw chen chu depression avangin a talbuai zui a ni. Rehab-ahte pawh a lut ve zak zak a, a tawpah erawh harsatna tam tak paltlangin a nghawng lenna music huangah a rawn zuang lut leh ta a ni.