Hontrade International Ṭhazual Lengzem-ah Jojo-i hun a thleng ta Jonathana'n hma a sawn

Jojo-i chuan a hla hit 'Tunah zawng' hmang­in a vawi khat nan Hontrade International Ṭhazual Leng­zem chart-ah No.1 a hauh. Hetih lai hian Mizo Idol star Jonathan Laleng­zauva chuan pahnih­na a hauh a, dinhmun sang ber hauh turin a dinhmun a siam ṭha zel.

Tun ṭuma pakhatna Jojo-i hian January khan a music video hi a tichhuak a, tunah chuan Lengzem hla thlan hlawh ber a ni der tawh. He hla hi a satu hian a sa nalhin a thluk pawh Mizo duh zawng tak a ni a, Ṭhazual chart-ah dinhmun sang ber a luah pawh hi a mak lo. Chart hmasa lamah khan pathumna a lo hauh tawh bawk a, tun ṭumah erawh No.1 a rawn ni ta.

Jonathana a riang lo!
Pangzawl tlangval Jonathan Lalengzauva hian January thla khan a music video hmasa ber a tichhuak a, 'Ka riang ngei e' tih a ni. A music video hi a hit hle a, ngaihthlak pawh a hlawh a - tunah chuan Jonathana hi a riang tawh lo.

'Ka riang ngei e' tih hla hi Landry Vl Vena Khawlhring phuah niin, Jonathana hian 'Ka riang ngei e' tih hla hi Mizo Idol 2018-ah pawh khan a lo sa lar tawh a ni. Music track hi Thangbawiha, EME Recording kutchhuak a ni a, video hi Hriatkima (Lianchhiari Picture) siam sak a ni thung.

Rpa Ralte leh G'nie an duai lo
Ṭhazual chart-ah No.1 an lo hauh tawh a, dah hniam chi rual an ni lo. Rpa Ralte leh G'nie te hian 'I la hria em' tih hla hmangin mipui an awi a, ngaithlak an la kham lo. Tun ṭumah pawh top 3-ah an lang leh a, an tlahniam tak tak thei lo.

'I la hria em' tih hla hi a satu Rpa Ralte leh G'nie te phuah hi niin, tunlai lengzem hla thlan hlawh ber pakhat a ni mek. Music hi Rpa Ralte leh Dialock te kutchhuak a ni bawk a, Mizote rilrem zawng tak a lo ni.

Satel lem!
Tun lai lengzem hla lar tak pakhat chu 'Satel lem' tih a ni a, Lenglawng huanga mi pawh a ni zawk mah awm e. He hla hi F. Zomuan­puia chuan music video siamin a rawn tichhuak a, a hit rem rem hle.

He hla hi February thla tir lam khan YouTube-ah upload niin, viewer pawh an pung chak hle a ni. A satu Zomuanpuia hian a sa thamin a aw nen pawh a inmil hle a, Ṭhazual chart-ah pawh a lan chhoh zel a rinawm a ni.

Tun ṭumah hian Essy chuan 'Hringnun' tih hla hmangin palina a hauh a, a hnuaiah Kimkima a awm ve thung. Fela Colney chuan 'Sensiari' a hlawhtlinpui zel bawk a, Temami chu pasarihna a ni. Top 10-ah hian Ticos Darhmingliana leh KR Robert te chu an lang ve leh bawk.