UNICEF ambassador aṭanga bang turin an phut

Indian actress Priyanka Chopra chuan tun hnaia Pakistan leh India inep chungchang a sawichhuah avang leh, Indian Armed Forces te thlawp zawnga thu a sawi avangin UNICEF Goodwill Ambassador aṭanga bang tura nawrna a tawk mek.

Online platform pakhat Avaaz chuan Priyanka lakah hian petition siamin, 'neutral' tawk lo-ah an puh a - UNICEF Goodwill Ambassador ni tlak lo a ni, an ti.

Priyanka Chopra hian February 26 khan Twitter-ah "Jai Hind #IndianArmedForces" tih a post a, Indian Air Force te chu a lawmpui thu a sawi bawk. Priyanka hian IAF ten LoC paltlanga Pakistan ram chhunga helpawl Jaish-e-Mohammed te camp an bomb chhia chu lawmawm a tih thu sawiin, an hmalakna chu fakawm a tih thu a sawi uar hle a ni.

Hei hian sawizui a hlawh hle a- a thusawi avang hian demna pawh a tawng nasa hle a ni. Petition siamtute chuan, "Nuclear nei ram pahnih inkarah boruak a sosan laia hetianga thu a sawi hi a mak hle a ni. Boruak muanawm a awm theih nana hma la tur zawk a ni a, hei vang hian UNICEF tana thawk zel tlak a ni lo," tiin Priyanka Chopra chungchang an sawi a ni.

Petition an siamah hian United Nations leh UNICEF te pawh hi 'tag' niin, signature 5,000 lak turah mi 4,200 zetin signature an pe tawh a ni. Hetih lai hian UNICEF chuan hemi chungchangah hian thuchhuah a siam lo a, online petition pawh hi a comment lo a ni.

Priyanka Chopra hi kum 2016 khan UNICEF Goodwill Ambassador atan hian ruat a ni a, UNICEF nen hian kum 10 vel zet chu an lo thawkho tawh a ni.