Pulwama attack-a nunna chan chhungte tan Mizo zaithiam leh musician te che chhuak

Tun hnaiah India-in chhiatna rapthlak tak a tuar a, sipai 40 zet a chan. He chhiatna rapthlak hian India mai ni lo khawvel a dengchhuak a, vanduaina tawk chhungte pawhin duhsaktu leh lainatu an ngah hle a ni.

Pulwama Attack-a nunna chan, sipai chhungte tan hian Mizo zaithiam leh musician te pawh che chhuakin, Banga­lore-ah charity concert an nei. StarPick bultumin March 1 zan khan charity con­cert hi neih a ni a, heta ṭanga sum hmuhte hi nunna chan chhungte tan hlan a ni ang.

Tute nge inlan?
He charity concert-ah hian Kimkima, Sangtei Khuptong leh Rebec­ca Saimawii te an inlan a, Shai Hills band te an perform bawk. An vai hian mi pariat an ni a, hnamdang perform an awm lo a - a buatsaihtu StarPick te hian Mizo te an rawn sawm vang vang a ni. Kimkima, Sangtei Khuptong leh Rebecca Sai­mawii te hian lawm an hlawh a, Shai Hills band te an che ṭha hle bawk.

He charity concert sponsor-tu zingah hian - Times of India, Indian Express leh BookMyShow te pawh an tel a, a theuneu lo hle a ni. He charity concert hi Bangalore-a media hrang hrangte pawhin an ngaihlu hle a, Mizo singer leh musician te chanchin hi an tarlang nasa hle a ni.

Concert an neihna hmun pawh hi Gilly’s Redefined niin, India ram pawn aṭanga lo kal te zaina hmun ber pakhat - an chhuanvawr ber te zinga mi a ni.

Enge a chhan?
Kan Mizo zaithiam leh musician chhuanvawr te hian February 26 khan Mizoram chhuahsanin Bangalore hi an pan a, charity concert a nih rual hian Mizo te hi India mi kan nih tih pholan chu an tum ber a ni.

'The Breeze' guitarist Bruce chuan, "Starpick te an fakawm kan ti a, he­tianga Mizote min lo duhsak hi a lawmawm tak zet a ni. Mizote hi India mi kan ni a, hnamdang zingah hre lo tam tak an la awm avangin hetianga hun min buatsaih sak hi kan lawm tak zet a ni," a ti. Bruce chuan Banga­lore-a Mizo ten an support ṭhat thu sawiin, lawmawm a tih thu a sawi bawk.

Bangalore-a fehchhuak te hian Pulwama attack-a nunna chan chhungte tan sum an thawhchhuah bakah hian, Mizo te min tihmingṭha hle bawk a ni. Kimkima, Sangtei Khuptong, Rebecca Saimawii leh Shai Hills band te hi Aizawl-ah an lo let leh tawh a ni.