Raltlante chhawmdawlna Rs 23,17,200 hlan a ni

LPS leh Zonet ṭangkawpin an buatsaih, March 27, Inrinni zana LPS Studio-a Myanmar raltlante chhawmdawlna tura 'Liberty for Myamnar Charity concert' aṭanga sum hmuh Rs. 23,17,200 chu Inrinni khan NGO United for Democratic Myanmar leh Central YMA kutah hlan a ni.

Liberty for Myamnar Charity fund hlanna inkhawm chu Daisy Zorammawii, LPS chuan a kaihruai a, Lalsawmliana Pachuau (LPS Director), Roneihthanga (Financial Secretary, CYMA) leh Lalramlawma (President, NGO United for Democratic Myanmar)-te chuan thu an sawi.

Zonet Director LV Lalthantluanga chuan NGO United Democracy for Myanmar kutah Rs 13,17,200 a hlan a, Rs 10,00,000 chu Mizoram chhunga raltlante hnena an sem tur niin Rs 3,17,200 chu Myanmar lama Zohnathlak unaute chhawmdawlna tura ruahman a ni.

LPS Director Lalsawmliana Pachuau chuan Central YMA kutah Rs10,00,000 hlanin, hei hi Branch YMA kaltlangin raltlan dawngsawngtu chhungkuate hnenah hlan chhawn tum a ni. Heng bakah hian zaithiam Vanlalsailova fan-te sum thawhkhawm ṭhahnem tak chu hlan a ni tel bawk.

LPS leh Zonet chuan Myanmar ram buai avanga Mizorama raltlan Zohnahthlakte lainata, chhawmdawlna sum thawhtu zawng zawngte chungah lawmthu an sawi a ni.