MDM-in an kum 10 tlin an lawm

Music Domain Mizoram (MDM) chuan Inrinni liam ta khan Sibyfarm-ah an kum 10 tlin an lawm a, he hunah hian R. Hmingthanzuala, Director, Art & Culuture chu khuallian a ni.

April 1 kha MDM din-cham ni mah se Kristian hunpui Good Friday lai a nih avangin a lawmna hun hi an sawn a ni. Inrinni khan chhunah General Assembly an nei a, an pawl kalphung tur tam tak an rel a, zan lamah 10th Anniversary programme hman chhunzawmin Kum 10 chhunga OB lo ni tawhte chawimawina pek an nih bakah MDM dintu Lalhmachhuana Hauhnar chu chawimawina pek a ni bawk.

LV Lalthantluanga leh Lalnunpuia, Zonet-te chu rimawi ngaina zofate tan an thawh hlawk em avangin ‘Mizoram Music Promoter’ chawimawina an pe bawk a ni.

Thuchhuah an siamah chuan MDM chuan Mizoramah pirate music video a tam avangin zaithiamte'n harsatna hrang hrang an tawh hre chungin Lalhmachhuana Hauhnar (Hauhnar Recording) chuan ngaihtuahna nasa taka sengin mi ṭhahnemngai dangte nen hemi kawngah hian hmalakna a awm beiseiin April 1, 2011 khan MDC chu an din ta tih an tarlang.

MDM chuan an hmalakna hmasaah chuan Bazara phalna nei loa music video zawrhte man khawmin an halral thu te bakah LPS leh Zonet-ah Demand Channel titawp tura an ngen thute an tarlang a, hemi avang hian Cable TV pahnihte chuan Demand Channel chu an titawp zui ta a ni, an ti.

Kum 2012 aṭang khan Mizoram-a a vawi khatna ni turin MDM Blanket License System hmangin Music Video Library a siam a, he library aṭanga an sum lakluh aṭangin Rs nuai 25 chuang an sem chhuak tawh a ni.

MDM hian amahin YouTube Channel bik a neiin, subscriber pawh nuai li chuang a nei tawh in, he channel hian Silver Play Button a dawng tawh nghe nghe a, YouTube channel aṭang hian Rs nuai 10 chuang an sem tawh bawk.