Box Office-a roreltu How to Train Your Dragon : The Hidden World
North American Box Office-ah roreltu thar a piang a, a hming chu How to Train Your Dragon: The Hidden World a ni. He fantasy/action film hian tun weekend-ah khan $mtd 30 zet lalutin dinhmun sang ber a luah a ni.
A Madea Family Funeral chuan pahnihna a hauh a, Alita: Battle Angel leh Lego Movie 2: The Second Part ten an dawt. Green Book chuan $mtd 4.7 lalutin top 5-ah a inhamtang ve leh bawk.
How to Train Your Dragon
Canadian actor Jay Baruchel leh American actress lar America Ferrera te aw thawhna How to Train Your Dragon thar The Hidden World hi tlangzarh an nih hma hauh aṭnga thawm nei lian a ni a, rinlawk ang ngeiin a che ṭha zui bawk.
Tun weekend chhung khan $mtd 30 zet a thawk chhuak a, North America pawn lam aṭangin $mtd 97.6 zet a lalut bawk. Box Office aṭanga a sum lakluh tawh zawng zawng hi $mtd 274.9 a ni a, a namai lo hle. How to Train Your Dragon : The Hidden World-ah hian Australian actress Cate Blanchett leh English actor Kit Harington te pawhin aw an thawh a, tun hnaia film chhuak thar zingah chuan en hlawh ber a ni mek.
A Madea Family Funeral
Tun hnaia comedy film chhuak thar A Madea Family Funeral chuan $mtd 27 a thawk chhuak a, Box Office-ah a inlar nghal. Rome Flynn leh Tyler Perry-te channa film hi March 1 khan release a ni a, khawvel hmun hrang hrangah chhuah chhoh mek a ni. He comedy film hi American actor Tyler Perry kutchhuak a ni.
Hetih lai hian Alita: Battle Angel chu top 3-ah a inhlangkai a, a sum lakluh zat chu $mtd 7 a ni. Alita hian hun eng emaw chen chu Box Office-ah No.1 a lo hauh tawh a, a sum lakluh pawh a tlahniam ve tial tial a ni. LEGO Movie 2: The Second Part pawhin $mtd 6.6 zet a lalut leh a, Box Office bika a sum lakluh tawh zat chu $mtd 136.6 a ni.
Oscar sem zawh taka award ngaihlut ber pakhat 'Best Picture' a lak hnuah Green Book hralh a kal leh sawt a, a sum lakluh hi 121% zetin a pung a ni. Tun weekend bikah khan $mtd 4.7 lai a lalut a, khawvel hmun dang aṭangin $mtd 76.9 zet a lalut bawk.
The Rock inlarna
February 14 khan drama/sports film 'Fighting With My Family' chu tlangzarh a ni a, a changtu zingah hian Dwayne 'The Rock' Johnson a tel avangin hralh pawh a kal hle.
Kar liamta chhung khan Box Office aṭangin $mtd 4.7 a lalut leh a, sum lalut tam parukna a ni. Fighting With My Family hi tun weekend aṭang khan UK-ah pawh chhuah ṭan a ni a, No.1 a hauh nghal a ni. Isn’t It Romantic chu sum lalut tam pasarihna niin, Greta leh What Men Want-ten an dawt a, Happy Death Day 2U chuan $mtd 2.5 lalutin top 10-ah a inhlangkai ve leh bawk.