Billionaire ni thei naupang ber Kylie Jenner
Forbes Magazine chuan khawvela mimal hausa zual a tarlang leh ta a, American reality star Kylie Jenner chu khawvela billionaire ni thei naupang ber a nih thu a puang. Kum 21 mi Kylie hi Norwegian - Alexandra Andresen leh Katharine Andresen te chuan an dawt a ni.
Forbes Magzine-in report thar ber a tichhuah hmaa billionaire ni thei naupang ber chu Facebook hmuchhuaktu Mark Zuckerberg a ni a, kum 23 a nihin billionaire a ni der tawh a ni. Hetih lai hian Kylie Jenner (21), Alexandra Andresen (22) leh Katharine Andresen (23) te chuan an rawn khum ta a ni.
Forbes billionaire list hi Thawhlehni khan tichhuah a ni a, mimala hausa ber chu Jeff Bezos niin Bill Gates chuan a dawt a - India sumdawng hausa tawntaw Mukhesh Ambani chu 13-na a ni.
Kylie a ropui
Kylie Jenner hian kum 2015 khan Kylie Cosmetics a din a, hetih lai hian kum 18 mi chauh a la ni. A sumdawnna hi a tifuh cher cher hle a, tunah chuan khawvela billionaire ni thei naupang ber record a rawn siam ta a ni.
'Keeping Up with the Kardashians' star hian nikum chhung khan Kylie Cosmetics aṭang hian $mtd 360 zet a lalut a, tun dinhmun hi a thleng ta a ni. Kylie chuan, "Beisei neia bul ṭan ka ni lo a, ka hma hun tur pawh ka ngaihtuah lo. Tuna ka thlen chin erawh ropui ka ti a, hmasawn zel pawh ka tum a ni," tiin a sawi. Model leh entrepreneur ni bawk Kylie Jenner hausakna hi $tld 1 velin an chhut a, a namai lo hle a ni.
Forbes hian nikum khan hmeichhe zinga sum lalut hnem berah Kylie Jenner hi a lo puang tawh bawk a, American zinga billionaire ni thei naupang ber nihna a chelh mek bawk.
Hriat ngai loh lanu!
Forbes billionaire list tihchhuah tharah hian rin loh takin Norwegian Alexandra Andresen leh Katharine Andresen-te an lang nawlh a, chhungte hausak zarzoa lang an ni thung! Alexandra Andresen leh Katharine Andresen te hian ro an khawm zarah he dinhmun hi an luah a ni.
Alexandra Andresen hi kum 22 mi chauh a la ni a, a hausakna hi $tld 1.4 zet a ni. Sum ngah lamah chuan Kylie Jenner pawh a khum a, amaherawhchu kum lama upa zawk a nih avangin khawvela billionaire naupang ber nihna a hauh phak lo a ni.
Kum 23 mi Katharine Andresen hausakna pawh $tld1.4 tho a ni a, Alexandra Andresen aia a kum a tam avangin pathumna a ni. Chutih rual chuan a kum zat angah tho hian Mark Zuckerberg pawh kha billionaire a nih avangin dahniam chi rual a ni lo. Youngest billionaire top 3-te hi hmeichhia vek an ni bawk.
Youngest Billionaire Top 3
1. Kylie Jenner (21) - $tld 1
2. Alexandra Andresen (22) - $tld 1.4
3. Katharine Andresen (23) - $tld 1.4
Jeff Bezos a hausa ber
Amazon.com Inc Chief Executive Officer (CEO) Jeff Bezos chuan a ṭum hnih nan hausa ber nihna a hauh leh a, a hnuaia awm chu vawi eng emaw zat hausa ber nihna lo hauh tawh Bill Gates a ni.
Jeff Bezos hausakna hi a kum telin a pung tual tual a, nikum aia a hausakna hi $tld 19 zetin a pung a ni. Kum 2018-ah khan a hausakna hi $tld 112 a nih laiin kuminah chuan $tld 131 zet a tling tawh a ni.
Hetih lai hian Microsoft co-founder Bill Gates hauasakna chu $tld 96.5 a ni a, nikum khan $tld 90 vel neia chhut a ni. Kum 88 mi Berkshire Hathaway CEO Warren Buffett chu pathumna niin, a hausakna hi $tld 82.5 zet a ni. Facebook CEO Mark Zuckerberg ($tld 62.3) chu top 10-ah langin - pariatna a hauh phak a ni.
1. Jeff Bezos - $tld 131
2. Bill Gates - $tld 96.5
3. Warren Buffett - $tld 82.5
Ambani-a'n hma a sawn
Indian zinga top 20-a lang awm chhun chu Mukesh Ambani a ni a, 13-na a ni. Kum 61 mi Ambani hi nikum khan 19-na a ni a, kumina erawh nasa takin hma a rawn sawn a ni.
Reliance Industry neitu Mukesh Ambani hausakna hi nikum khan $tld 40.1 a ni a, kuminah erawh $tld 50 a kai a ni. India mai ni lo Asia khawmualpuia hausa ber nihna chelh mektu a ni a, a namai lo hle a ni.
Indian zinga hnaih bertu chu Azim Premji niin, 36-na a ni. Top 100-ah hian Shiv Nadar (82) leh Lakshmi Mittal (91) te chu an lang ve bawk.
1. Mukesh Ambani - $tld 50
2. Azim Premji - $tld 22.6
3. Shiv Nadar - $tld 15.1
Hmeichhe zinga hausa ber Françoise Meyers
French author lar Francoise Bettencourt Meyers chu hmeichhe zinga hausa ber niin, a pumpuiah pawh 15-na a hauh phak a ni. Meyers hi Alice Walton chuan a dawt a, top 20-a hmeichhe lang awm chhun an ni.
Francoise Bettencourt Meyers hi a rokhawm hmanga insiam lian niin, author hriat hlawh tak a ni a, a hauasakna hi $tld 49.3 zet a tling a ni. Walmart founder Sam Walton-a fanu Alice Walton pawh rokhawmtu a ni a, a hausakna hi $tld 44.4 khat zet a ni.
American investor Jacqueline Mars chuan pathumna a hauh thung a, a neih ro sum zawng zawng hi $tld 23.9 zet niin, a pumpuiah 33-na a hauh phak bawk.
1. Francoise Bettencourt Meyers - $49.3
2. Alice Walton - $44.4
3. Jacqueline Mars - $23.9
American an chungnung
Khawvela ram ropui ber an ni a, hausak lamah pawh khawvel an thunun hneh hle. Mi hausa ber ber thlanchhuah zingah American an tam ber a, a hausa zual top 3 - Jeff Bezos, Bill Gates leh Warren Buffett te hi American vek an ni.
Anni bakah hian Larry Ellison ($tld 62.5), Mark Zuckerberg ($tld 62.3), Michael Bloomberg ($tld 55.5) leh Larry Page ($tld 50.8) te chu a hausa zual zingah hian an tel bawk a ni.