Facebook India leh Josh Talks-ten Aizawl-ah Talk Show buatsaih dawn
Facebook India leh India rama YouTube talk show lar tak Josh Talks, New Delhi ṭangkawp chuan March 8, Zirtawpni hian Aizawl-ah The Citizens’ Townhall Community Talk Show an buatsaih dawn.
Facebook India leh Josh Talks te hian ṭhalaite hnenah voter awareness campaign #MakeYourMarkOnline beihpui an thlak ṭhin a, India President hnen aṭangin chawimawina pawh an lo dawng hial tawh a ni. Tunah hian India ram khawpui 10 thlang chhuakin, ṭhalaite’n ram inrelbawlnaa chanvo an neihte uar takin an zirtir mek a ni. Khawpui thlanchhuah zingah hian Aizawl pawh a tel a, Talk Show hi buatsaih a ni dawn ta a ni.
Aizawl-a ‘The Citizens’ Townhall’ buatsaih turah hian Ashish Kundra, IAS chu a rawn tel dawn a, panel ṭha tak tak ten ram inrelbawlna kawnga mawhphurhna leh chanvo hrang hrangte hrilh hriatna hun an hmang dawn a ni. He hunah hian a duh apiang tel theih niin, ṭhalai leh college zirlaite tan phei chuan hmaih phal chi a ni lo.
Joshtalks-ah hian milar tak tak ten thu an lo sawi tawh ṭhin a, film director Anurag Kyashap, IPS zinga hriat hlawh Naveet Sikhera, Anna Hazare leh rapper Emiway Bantai te pawhin thu an lo sawi tawh bawk a ni.