Mystical Mizoram Ṭhazual Lengzem-ah 'Mizo Nula' kimtlang a mawi ber

Mystical Mizoram Ṭhazual Lengzem chart-ah 'Saw Nu Saw a Hmelṭha' hitmaker Keimah Senes, Tlangval Tlumtea ft. Lil Me-te hla 'Mizo Nula' chu pakhatna a ni. Ronald Zothantluanga 'I zun ngaih hi' chu pahnihna a ni a, Govt. J Buana College 'Leitlang Dingdi' chu pathumna a ni bawk.

Rose par ianga mawi 'Mizo Nula'
Keimah Senes leh Tlangval Tlumtea te hian kum 2019 kum chawhnu lamah khan hla hit zet mai, Mizo rilrem zawng tak 'Saw Nu Saw a Hmelṭha' tih hla an rawn tichhuak a, he hla larzia leh kawi tinah an play emaw tih tur khawpa duhtu an tam zia chu sawi tam a ngai lo.

Chutichuan, kum khat vel a ral leh chiah tihah Keimah Senes leh Tlangval Tlumteate chuan Lil Me thawhpuiin hla thar mawi tak, music ngainatawm tak, Mizote tana ngaihthlak nuam tak 'Mizo Nula' tih hla an rawn thlawh chhuak leh ta a ni. An hla hmasa aiin a hit zawk emaw tih mai turin a lar lehnghal vet vet hle a, YouTube-ah phei chuan thlirtu maktaduai 1.6 chuang zu han nei tawh a!

A hla a thothang ṭha a, ṭhalaite duhzawng tak a nih bakah music video a hmuhnawm bawk nen, Ṭhazual chart-ah pawh an zuang lut vat a, tunah phei chuan chart topper hial an ni ta a ni.

Pahnihna leh Pathumna chu...
Ronald Zothantluanga'n nikum kum tawp dawn lama a tihchhuah 'I Zun Ngaih hi' chu pahnihna a ni. Chart hmasaah khan pangana a ni a, tunah pahnihnaah a rawn invawrh a ni. Pathumna chu Govt. J Buana College music video 'Leitlang Dingdi' kha a ni a, anni pawh hi chart hmasaah khan parukna an ni a, tunah erawh top 3-ah an rawn inhlangkai ve ta bawk a ni.

Kimkima leh Apuii Chhangte
Kimkima hla thar ber 'Ka Damlo' chu palina a ni a, Apuii Chhangte chuan 'Engan Ka Lo Tawn Che' hmangin top 5 a khar thung.

Tunṭum Ṭhazual chart hi a hot hle a, top 10-ah hian Siampuii Ralte, Jenny Jathang leh Grace 10:45-te pawh an lang a, anni bakah hian SM Bawihtlung leh Roluahpuii-te pawh an la lang bawk a ni.