BAFTA Film Awards 2021 ‘Nomadland’ a che ṭha ber

British Academy of Film and Television Arts (BAFTA) Film Awards 2021 chu Royal Albert Hall, London-ah tun Inrinni leh Pathianni liam ta khan sem a ni a, Nomadland chu che ṭha berin award pali lai a dawng.

An ram huna Inrinni zanah khan a hawnna hun hmangin British TV leh Radio presenter Clara Amfo chuan host-in Pathianni khan award semna hunpui chu an hmang thung a, hetah hian Scottish Radio DJ Edith Bowman leh English TV presenter Demont O'Leary-te chu host an ni thung.

BAFTA Film Award-a nomination list hi March thla tir lamah khan puan chhuah niin Nomadland leh Rocks chu nomination hmu tam ber an ni a, pasarih ve ve an hmu a ni.

Nomadland chuan award ngaih hlut ber Best Film award pawh a dawng nghe nghe a, a director Chloé Zhao chu Best Director-ah thlan niin a changtunu Frances McDormand chuan Best actress award a dawng bawk a; chumai chu la duhtawk loin Best Cinematography award pawh Nomadland 'Joshua James Richards' chuan a dawng a ni.

British mite'n film award an ngaihhlut ber BAFTA Award vawi 74-na semnaah hian director lar Ang Lee chuan BAFTA Fellowship award a dawng a, Rising Star Award chu Rocks film-a a changtunu Bukky Bakray kutah hlan niin, ani hi kum 19 chauh a la ni a, BAFTA Rising Star Award dawng thei naupang ber a ni hial. Outstanding British Contribution to Cinema chu Noel Clarke-in a dawng bawk.

Best Special Visual Effects chu Christopher Noland-a film Tenet-in a dawng a, Best Documentary-ah My Octopus Teacher thlan a ni thung.