India Box Office : Gully Boy khum thei la awm lo
Tun hnaia Bollywood film chhuak thar zingah, Ranveer Singh leh Alia Bhatt te channa 'Gully Boy' aia hit a awm lo a, sum lakluh tam lamah khum thei an la awm lo.
February 14-a tlangzarh Gully Boy hian Indian Box Office-ah ro a rel mek a, a sum lakluh tawh zawng zawng chu vaichelchhe 130 zet a tling tawh a ni. He drama/romance film hi kumina Bollywood film chhuak zinga sum lalut hnem ber dawttu a ni mek bawk a, a tluk loh awm chhun chu Uri: The Surgical Strike a ni.
Ranveer & Alia Bhatt
Kum 33 mi Ranveer Singh leh Alia Bhatt (25) te hi tunlai Bollyood star zingah chuan thawm nei lian ber tih ngam an ni a, an hawina lam apiangah mipui an thle dual dual a ni ber.
An chan dunna Gully Boy pawhin entu a ngah phah a, hei hian sum lakluh kawngah pawh nasa takin a pui a ni. Thla khat em pawh a ral hmain vbch 100 chuang an lalut der a, hei hian an thawm len zia a tilang chiang hle a ni.
Khawthlang lamah a tla na
Gully Boy hian North America a thleng thla tawh a, mipui pawhin an hlut hle. Tun hnaia a sum lakluh $mtd 10 zinga 50% zet chu US leh Canada aṭangin a ni a, hralh a kal hle a ni.
Heng bakah hian UAE, UK leh Australia lamahte entu an tam a, sum pawh a thawkchuak ṭha hle a ni.
Total Dhamaa
Tun hnaia Bollywood film chhuak thar dang Total Dhamaa pawh sum lakluh kawngah a che ṭha hle a, vbch 123 zet a lalut tawh. Ajay Devgan, Anil Kapoor leh Madhuri Dixit te channa hi February 22 khan tlangzarh niin, rin phak bakin a che ṭha a ni.
Hetih lai hian - Luka Chuppi leh Ek Ladki Ko Dekha Toh Aisa Laga te chu tun hnaia thawm nei lian zual an ni bawk a, Sonchiriya leh Amavas te pawh sawi hmaih theih an ni lo bawk. Sonchiriya hi March 1 khan release niin, Amavas pawh hi February khan tichhuah a ni.