Hringnun : hlawhtlinna leh hlimna - Chetan Bhagat

Chetan Bhagat hmelhriat lo an awm a nih pawhin a lehkhabu ziah hmanga film siam 3 idiots leh 2 States hre lo chu mi tlem tê chauh an awm tawh ang. Vanapa Hall-ah filmstar Amir Khan leh Alia Bhatt te lar tawh sa lar belhtirtu Bhagat a rawn lang a, a hun tawn behchhanin 'Life - Success & Happiness' tih hmangin thu a rawn sawi a, mi bik a nih zia a pholang.

Hringnun : hlawhtlinna leh lawmna
Eng nge hlawhtlinna. Sum ngah, tum tih hlawhtling, hlimna leh ... te hi em ni. Ni lo e. Hlawhtlinna hi mimal tinah a hrang hrang zel.

Aukaat : 'Aukaat' hi vai ṭawng a ni a, kan la hre lo a nih chuan 'kan theih chin tawk' tiin a sawifiah theih ang a, kan chhehvela awmte a zira thlen theih kan in beisei phak tawk hi 'aukaat' chu a ni. India ramah chuan zirna kan ngai pawimawh a, board exam kan la thu tak lehzual.

Class X ka nih khan board exam-ah 76% ka hmu a, result chhia chu a ni hauh lo nangin a ṭha lo a. Ka chhungten min hual ṭhup kara ka mark han sawi lan pawh a inthlahrunawm a, an fapa mark chu an chapo puilo tih a lang reng mai.

Kan inngaihtuah nawn leh a, khatih hunlaia lawm hlawh 'Phone Booth' hawn chu ka ngaihtuah chhuak ta a. Ka hlawhtling a nih chuan India khawpui Delhi-ah pahnih ka hawng ang a, chu chu ka ngaihtuah phak tawk 'aukaat' chu a ni a, ka chhungte pawhin min ṭawmpui.

Uluk taka ngaihtuah chungin ka chhungte hmel ka hmuh khan hlawhtlinna a ni lo tih ka hria a, ka tum ka thlak a. Ṭha taka lehkha ka zir hnuin IIT a lut turin ka in ziak tling. Ka chhungte chuan, "He nauah hian theihna a awm," an ti chho ṭan a.

Amaherawhchu ka sawi duh chu billionaire fapa ni la, pa te hausakna hmangin hausa ta ila. Tuna ka sum neih let pawh hi nei ila, ka thusawi ngaithla turin in rawn kalkhawm lo ang. Hlawhtlinna hi sum a teh a ni lo a, hlawhtlinna chu 'aukaat' paltlang hi a ni.

Passion : Hlawhtling tur chuan châkna tak tak (passion) a ngai a, hei hi kan thil tum min hruai thleng thei tur a ni a. Kan châk zawng kan tih chuan kan thawkrim bik a, 76% hian ka nihna a sawifiah lo tih lantir kan tumna khan thawhrim lehzualna min pe a ni.

Goals : Thil tum 'Goal' hi kan hre fuh lo fo a, kan suangtuahna 'dream' nen hian kan ngaih pawlh lo tur a ni. College ṭhaah ka kal châk tih te, weight ka paih dawn tih te hi goal a ni lo a, suangtuahna chauh a la ni.

Kum li chhungin college ṭhaah ka kal ang, thla khat chhungin kg thum ka paih ang, tih te hi Goal chu a ni.

Long Effort : Goal a nih dawn chuan hun a duh rei a, kan tlin ta ṭhin lo. College ṭha luh tumin ni khatah dar 15 ka zir ang kan ti a, a ni telin kan tla thla zel a, ni thum ni li lekah kan hlawhchham leh mai ṭhin. College ṭha a kal hi ka duh kher lo, ka weight paih kher hi a ṭulna ka hre lo, tiin kan inhnem a, hlawhltinna erawh kan hlat thung.

Thui tak kan thlir chuan hma­chhawn kan zuam lo a, chuvangin kan hmachhawp kha kan ṭhen hran thiam a ṭul. Lekha zir mi chuan kum khat chhunga a zir tur kha kar khat te tein zir tur chin a bituk ang a, kan huphurhna tam zawk kha a bo thei ang.

Pain : Nat hi kan hlau ṭhin, mahse hei hi hlawhtlinaah a bet tlat a ni. Intih cher tumin ṭan lak in tum a, taksa na leh sil ṭhem ṭhum tur peih loin chaw tui ṭha ṭha leh thlum ṭha ṭha thlang la. Rei lote atan chuan natna chu i pumpelh mahna mah se a hnuah natna lian zawk i hmachhawn dawn - mahni intha zawh lohna mai ni loin zun thlum thleng pawhin a ni thei ang. Nat hi hringnun a bet tlat a ni a, natna tel lo chuan hlawhtlinna a awm thei lo.

Distractions : Hlawhtling tura kan zinkawngah hian rilru la pengtu an awm ṭhin. Tunlai khawvela mi tibuaitu lian ber chu smartphone hi a ni a, kan naupan laia a la chhuak lo hi ka vannei takzet a ni.

Phone khawih zat chhutna apps a awm a, ni khatah darkar nga te ka hmang ṭhin. Darkar 24-ah mut hun, chaw ei hun leh intih fai hun te hi dah ṭha ila, darkar 15 vel a la awm a, chung zinga hmun thuma ṭhena hmun khat chu smartphone khawih nan ka hmang - a tam takzet a ni.

Kei pawhin khawih tlem tumin hma ka la a, zirlai tan chuan hmelma a tling. Kan hlawhtlinna tura min dal theitu lian ber chu social media hrang hrang hi a ni a, kan insum a ṭul a ni. India ram ṭhalai tam zawk hian social media hi an 'addict' a, heng kara buai ve lo kan nih chuan hlawhtlinna kawng a inhawn zau phah ang.

Setbacks : Hlawhtlinna hi a kaltluang purh lo. 2 States tih film-te chu in hria a, Hello tih film inhria em? ka film buaipui hmasa ber ni mah se a hlawhchham avangin in hre lo ang. Ka lehkhabu One Night @ the Call Center tih behchhan siam a ni a, beidawn phah ilang chuan tun hi ka thleng lo ang.

Failure : Hlawhchham hi hlawhltinna tura pawimawh ber a ni a, mi hlawhtlingte hlawhtlinna hi vawi tam tak hlawhchhamna aṭanga rawn thleng a ni. Hlawhchhamna hi a hrehawm takzet a, rilru lam­ah harsatna neiin kan mittui te a tla a, hlawhchhamna vanga hreh­awm tih hi pawi tih loh tur a ni a, amaherawhchu hlawhchhamna avanga bansan erawh kan tih loh tawp tur a ni. Midangin min sawi dan hi ngaituah loh tur a ni a, hlawhchhamna tel loin a hlawhltin theih loh.

Perserverance : Hlawhchhamna karah hian kan tlo tlat tur a ni a, mi hlawhltingte thuruk chu an daih reina hi a ni. India ramah hian author ṭha ber ka ni lo, engineer ka ni a, thuziak mi pawh ka ni lo a, chumi tura inzir pawh ka ni lo. Expert zawt pawh zawt ula, an pawm nghal ang.

Amaherawhchu lehkhabu hralh ṭha ber ka ni a, chu chu ka dang­lamna a ni a, ka beidawng ve lo. Hlawhtlinna hi class room-a mark hi a ni lo a, class-a pakhatna hi a hlawhtling ber an ni lo a, kan nitin nun hi chu mark-a teh theih a ni lo. Chutih rualin hlawhtlinna hi hlimna tel loin a famkim lo a, kan hlawhtlin chuan kan hlim tur a ni.

Chetan Bhagat
Pian Kum : 21st April 1971 (age 47)
Khua : New Delhi, India
Zirna : Army Public School, Dhaula Kuan
Indian Institute of Technology, Delhi (B. Tech)
Indian Institute of Management, Ahmedabad (MBA)

A kut chhuak
Novels
Five Point Someone (2004)
One Night @ the Call Center (2005)
The 3 Mistakes of My Life (2008)
2 States (2009)
Revolution 2020 (2011)
Half Girlfriend (2014)
One Indian Girl (2015)
The Girl in Room 105 (2018)
Non-fiction
What Young India Wants (2012)
Making India Awesome (2015)

Chawimawina
Society Young Achiever award, 2004
Publisher's Recognition award, 2005
The 100 Most Influential People in the World, 2010 - Time Magazine
Filmfare Award for Best Screenplay 2014: Kai Po Che
CNN-IBN Indian of the Year in Entertainment, 2015

* Chetan Bhagat hi Young Indians (Yi) Mizoram Chapter-in an chah chhuak; NEIDA, MZU Incubation Center, Zothan Autoworks, Tuma Glass House, Mission Organic Mizoram, Vanglaini leh Zonet ten an sponsor a ni.