MPS Kut Lady 2019 Sheila B. Lalrinpuii

Mizo Photographers' Society (MPS) Chapchar Kut Lady 2019 atan Khatla nula Sheila B. Lalrinpuii chu thlan a ni.

1st Runner Up chu Elizabeth Lalhriatpuii, Ramhlun North niin, Saikhamakawn nula hmelṭha Judy Zonunsangi chu 2nd Runner Up a ni.

MPS hian nizan khan Dawrpui Multipurpose Center-ah result puanna hi an nei a, kawng hrang hranga endik an nih hnuah Sheila B. Lalrinpuii hi Kut Lady atan an thlang ta a ni.

Kut Lady hian lawmman pawisa fai Rs. 10,100 bakah cita­tion leh thlalak frame a dawng a ni. 1st Runner Up leh 2nd Runner Up-te hnenah hian Rs. 7,100 leh Rs. 5,100 bakah, citation leh thlalak frame hlan an ni bawk.

Sheila B. Lalrinpuii
Sheila hi Miss thlan tih velah a la tel ngai lo va, Kut Lady hi he lama a sulhnu neih hmasak ber a ni. MPS ten Chapchar Kut nia Mizo thuam inbel nula hmelṭha an thlanchhuah zingah telin, tun hi a thleng ta a ni.

Sheila hian Jesus and Mary College, New Delhi aṭangin MA a zo tawh a ni.

Elizabeth Lalhriatpuii
1st Runner Up Elizabeth Lal­hriat­puii hi Aizawl North College-ah 6th semester a ni zir mek a, North College Miss 2017-ah pawh lo tel tawh a ni.

Judy Zonunsangi
Saikhamakawn nula Judy Zo­nun­sangi hi Aizawl College-ah kalin, 4th semester a zir mek. Aizawl College Miss 2018-ah pawh a thleng sang pawl niin, MPS Kut Lady thlan-ah 2nd Runner Up a rawn ni leh bawk.

Mizo Photographers' Society hian kum 2013 aṭang khan kumtin Chapchar Kut Lady hi an thlang ṭhin a, kumin hi a vawi sarihna a ni. Kut Lady hmasa ber chu Sarah Lalnunsangi, Zonuam niin, nikum khan H. Lalrindiki chu Kut Lady-ah an lo thlang tawh bawk.

Result puan zan hian MPS Lady lo ni tawh Zomuankimi, Miss Zofa International (1st Runner Up) leh Baryl Vanneihsangi, Vulmawi Award 2018 (Best Annoincer)-te hnenah chawimawina hlan an ni. He hunah hian Israel Labiakrema leh Zorinzuali Khiangte te an zai bawk a ni.