Box Office: Godzilla vs Kong pakhatna a ni leh
Box Office-ah kar hmasaa sum lalut tam ber Godzilla vs. Kong bawkin sum a lalut tam leh ber a, $13,880,000 lai a lalut leh.
Godzilla vs. Kong sum lakluh a tam tawh
Sakawlh pahnih insual film hian ngaihhlut a hlawh a, Covid-19 hripuiin khawvel a chawh buai hnuah North America Box Office-ah Godzilla vs. Kong ang reng renga film sum lalut tam a la awm lo.
Kar tawp liam taah khan theatre 3,064-ah pek chhuah a ni a, $mtd 13.8 lai a lalut leh a, chart-ah pawh a sum lakluh a la tam fal hle. Tlangzarh karah phei chuan $mtd 32 chuang lai a lalut a nih kha. Tunah chuan $70,000,000 lai sum a lalut tawh a ni.
US ni lo ram dang aṭangin $268,600,000 lalut tawh bawkin tun kar tawp liam ta thleng khan $338,600,000 lai sum a lalut tawh a, an budget $mtd 155–200 chu an khum hneh tawh hle.
Mi ṭhenkhat phei chuan Box Office awi nung leh tur hialin an ngai tawh a, hetiang zat sum a lakluh theih takah hi chuan 'big budget' film dang, tlangzarh hun an sawn hlat reng ho pawh an tlangzarh ngam tawhin a rinawm.
Nobody leh The Unholy
Kar hmasa lama sum lalut tam pathumna Nobody chuan pahnihna The Unholy chu lehthalin pahnihna a rawn ni a, theatre 2,400 aṭang $2,646,600 a lalut. Hetihlai hian The Unholy chu theatre 1,850-ah pek chhuah a ni thung a, $2,401,596 lalutin pathumna a ni.
Palina chu kar eng emaw zat pakhatna lo ni tawh Raya and the Last Dragon kha a ni a, he film hian $mtd 2.2 chuang sum a lalut thei bawk.
Top 10-a film thar awmchhun Voyagers
Sci-Fi film thar Voyagers chu Box Office Top 10 chart-a film thar awmchhun a ni a, $1,379,988 a lalut. He film hi ṭhalai 30 lai van boruaka chenna thar zawng tura an tirhchhuah chanchin a ni a, Sci-Fi film hmuhnawm ti tan chuan hmuhnawm tak tur a ni. A changtute pawh an lar hlawm hle a, Tye Sheridan, Lily-Rose Depp, Fionn Whitehead, Colin Farrell, Chanté Adams, Isaac Hempstead Wright, Viveik Kalra leh Archie Renaux tihte an ni nawk hlawm.
Box Office Mojo chart-a tarlan film 35 zingah film thar tlem azawng a awm a, 19-na Held, 26-na Moffie leh 32-na Slalom-te chu film thar an ni.
