NETFLIX-ah Gundam Live-Action film

Anime en ṭhin tan chuan thu lawmawm a nih a rinawm a, ṭhenkhat erawh chuan live action-a siam atan chuan an ui deuh mai thei. Engpawhchu nise, Netflix chuan Gundam chu live-action film-in an siam dawn tih an tarlang.

Streaming service zinga subscriber ngah ber Netflix chuan Kong: Skull Island director Jordan Vogt-Roberts chu Gundam film direct tur hian an pe fel tawh tih an tarlang a, Y: The Last Man, Ex Machina, leh Runaways-te hmanga hming lo chher lar tawh comic book writer Brian K. Vaughan chu script ziaktu tur a ni bawk.

Yoshiyuki Tomino leh Sunrise siam Gundam hi media fanchise lar ber zinga mi a nihna a rei tawh a, kum 1979-ah daih tawh khan Yoshiyuki Tomino-te hian a franchise hmasa ber Mobile Suit Gundam Anime chu lo tichhuak tawhin, lawm a hlawh hle a, an hlawhtlinpui hle nghe nghe. Hemi hnu hian a sequel tan tak an siam leh tawh a ni.

Gundam live-action movie siam tur hian Sunrise leh Legendary Pictures chuan kum thum vel lai chu hma an la tawh a, kum 2018 Anime-Expo-ah daih tawh khan an hmalakna hi an lo sawi lang tawh a ni. March 2019 khan an project-ah Brian K. Vaughan a tel tih an tarlang leh bawk a, mahse an reh zui deuh vang vanga, tunah chuan Netflix lama tihchhuah tura siam a ni tih puangzarh a ni leh ta a ni. Production engtikah nge an ṭan dawn tih leh tunge changtu tur tih erawh an la tarlang lo.

Tunlaia film huhang ngah ber Godzilla vs. Kong pawh kha Netflix hian $mtd 200 senga an Legendary hnena platform-a tihchhuah an dil nia tarlan a ni tawh a, mahse WarnerMedia khan HBO Max lama pek chhuah an duh avangin Legendary chu an dal ta a ni.