Shah Rukh Khan-te nupain an office Quarantine facility atan hman tir
Bollywood superstar Shah Rukh Khan leh a nupui Gauri Khan-te chuan Mumbai-a an office, chhawng li laia sang chu quarantine facility atan an hman tir.
BMC (Brihanmumbai Municipal Corporation) twitter enkawltu chuan kar kal ta Inrinni khan hemi chungchang hi tweet-in Shah Rukh Khan-te nupa chuan an office chawng li laia sang chu naupang, hmeichhia leh kum lama upate khung hranna atan an hman tir thu tarlangin an lawm thu an tarlang nghal bawk.
BMC tweet siam hnu lawk hian twitter lamah chuan "#SRKOfficeForQuarantine" a lar chhunzawm hle a, Shah Rukh Khan fan-te'n sawi nuam an ti hle a ni.
SRK a che ṭha
Kar hmasa kar tir lamah khan Shah Rukh hian Prime Minister's Citizen Assistance and Relief in Emergency Situations Fund (PM-CARES), Maharashtra Chief Minister's Relief Fund, Ek Saath - The Earth Foundation leh Roti Foundation-ahte chhawmdawlna a pe dawn tih a lo sawi tawh bawk.
SRK hi tunah hian West Bengal Brand Ambassador a ni mek bawk a, West Bengal leh Maharashtra-ah Personal Protective Equipment (PPE) kit 50,000 a pek dawn thu a sawi bakah Mumbai-a chhungkaw 5500 vel tan nitin ei tur thla khat vel tal a ngaihtuah sak dawn thu a sawi bawk. Heng bakah hian ṭanpui hnadang pawh a thawk nasa hle a ni.
Film star chuai thei lo SRK hi nikum khan University Of Law, London chuan chawimawina atan philanthropy Doctorate a lo hlan tawh nghe nghe. Kum 54 lai ni tawh mah se Bollywood star zinga huhang ngah ber a la ni reng thei.