Jessica Chastain leh Steven Spielberg-te'n Healthcare worker-te ei tur an tum sak
Jessica Chastain leh Steven Spielberg-te chuan Coronavirus dona kawnga hmatawngtu (frontline), damdawi-in staff-te ei tur chaw an tum sak.
Sci-Fi film turu tak 'Interstellar' actress Jessica Chastain hian Lenox Hill Hospital, New York City-a Covid-19 kai enkawltu Intensive Care Unit (ICU) staff-te tan ei tur eng emaw zat a thawn a, chung ei tur tuihnai tak tak a thawnna bawmah chuan, "Kan superhero in nih avangin kan lawm e, tunah hian kan mamawh che u a ni," tih a ziak.
"He ei tur tlemte hian mi maktaduai tel lawmna inthlen tir tih a hriat nawntir che u ka beisei. Keipawh ka lawm, With love, Jessica Chastain," tih a ziak tel bawk.
Film director lar Steven Spielberg pawhin Providence Saint Joseph Medical Center, Burbank, California-a thawkte tan Indian food lunch leh barbecue dinner a buatsaih sak bawk.
Providence Saint Joseph Medical Center hi Spielberg-a Amblin Entertainment production company office bul lawka awm a ni. An eitur a thawnnah hian ani pawh hian "frontline ER heroes" tih a card-ah ziakin a thawn tel.