Science & Environment April supermoon: Kumin chhunga thla en ber tur
Tun thla, April thlaa thla bial lo thleng tur hi a danglam dawn hle niin mithiamte chuan an sawi a, kumin chhunga thla bial eng ber leh lian ber a ni dawn an ti.
April thla bial hi Pink Moon tiin khawthlang ṭawng chuan an sawi ṭhin a, kumin bik hi chuan Super Pink Moon tiin an sawi dawn. Thla bial tur hi thla bial (full moon) satliah ni loin 'supermoon' a ni dawn niin an sawi.
India-in a hmuh ve loh tur April supermoon
Vanduaithlak takin India rama chengte chuan he supermoon hi kan hmu ve dawn lo a, a chhan chu a en zual lai ber leh a lang len lai ber hi khaw en lai a nih dawn vang a ni. India ram hunah chuan April 8 zing dar 8:05-ah a en lai ber hi a thleng dawn tlat a, chuvang chuan thla bial eng ber zan chu kan tawng ve dawn lo. GMT-ah erawh zing dar 2:35-ah a thleng dawn thung.
A duh tan livestream a en dan a awm
Kan ramah chuan khaw en lai a ni dawn miau a, kan hmu ve thei dawn lo. Mahse khawvel a changkang tawh a, online website aṭangin a en thei dawn a, 'Slooh' chuan thla eng hi an live dawn a ni. A en theihna tur link hi an la tihchhuak thuai dawn tih an sawi.
Pink Moon?
Thla bial hming phuahah hi chuan native American ho hming phuah khu khawvel hian a ṭawmpui nual.
'Pink Moon' pawh hi pangpar senno (Phlox subulata), April thla bial hunlai vela North America-a par ṭhin a awm a, chumi vang chuan thla eng rawng hi a 'pink' ta tihna ni loin chu pangpar hmingchawi chuan a hming an vuah ta niawm tak a ni.
Supermoon
Supermoon hi thla orbit-in khawvel a hnaih lai ber a ni. Khawvel leh thla a inhnaih lai ber a nih avangin thla eng dang aiin a eng zawk a, a lang lian zawk bawk. Super Pink Moon-ah hian thla hi khawvel aṭangin km 356,907 vela hlaah a awm dawn niin mi thiamte chuan an sawi. Khawvel leh thla inkar hi a tlangpuiin km 384,400 vel a ni ṭhin.
Full moon zawng zawng hi Supermoon a ni vek lo bawk.
March thla tir lam, March 9-11 inkar khan March supermoon a thleng tawh bawk a, hei hi Super Worm Moon tiin an sawi ve tho bawk a ni.