Jennifer Lopez leh Alex Rodriguez an inhual

American singer Jennifer Lopez leh baseball star Alex Rodriguez te chuan an inhual thu an puang ta rup mai. J.Lo leh A-Rod te hian kum hnih an inzui hnuah Inrinni khan Instagram kaltlangin an inhual thu hi an puang a, inhualna zungbun pawh an tarlang a ni.

Kum 49 mi Jennifer Lopez leh Alex (43) te hi 2017 aṭang khan an inzui ṭan a, a tir aṭang phatin mipui ngaihven hlawh an ni. Kum hnih chuang awrh an inzui hnuah an inhual ta a, lawmpuitu pawh an ngah hle a ni.

J.Lo leh A-Rod te hian an inhual thu hi social media lamah tarlangin, Yankees player hlui Alex chuan caption-ah, "She said yes," tih a hmang a ni.

Hmanah chuan...
Jennifer Lopez leh Alex Rodriguez te hi a vawikhat nan May, 2005 khan an intawng a, khatih lai khan J.Lo hi American singer Marc Anthony-a nupui duh lai a ni! Alex Rodriguez pawh hi Cynthia Scurtis nen an inneih lai a ni a, New York Yankees atana a khel lai hi J.Lo leh Marc te hian a hmunah an en a ni.

Hemi ṭum hian J.Lo leh Alex te hi an inchibai nghe nghe a - khatih lai khan tun hun hi an thleng ang tih an ngaihtuah phak kher awm love! Kum 10 chuang zet a liam hnu 2016 khan J.Lo leh A-Rod te hi Beverly Hills, Los Angeles-ah an intawng leh a, heta ṭang hian 'ri ret ret' hi a awm ṭan ta a ni.

Amaherawhchu J.Lo hi Cana­dian rapper Drake nen sawi zawm an ni ve reng a, 2017 kum tir lam thleng khan sawizawm an la ni. Hei vang hian J.Lo kawppui tak hi hriat a ni mai lova, an inrinsiak a ni ber.

Alex Rodriguez pawh a bang bik lo, hetih hun lai hian J.Lo bakah - Kate Hudson, Cameron Diaz leh Madonna te nen sawizawm a ni!

An inpuang ta!
J.Lo leh A-Rod te hi midang dangte nen sawizawm ni bawk mah se, a tawpah erawh thu dik chu zep rual lohin a langchhuak ta. April, 2017 khan Jennifer Lopez hi The Ellen Show-ah a inlan a, hemi ṭum hian a kawppui hi dawpchhuah a ni ta a ni. J.Lo chuan A-Rod nen an inkawp thu a sawi ta a, hetaṭang hi chuan hnunglam an hawi leh tawh lo.

Mipui vantlang hriata an inzui thu an puan hnu lawk hian Met Gala-ah a vawi khat nan red carpet an zawhdun a, Paris lamah chawlh an hmang zui bawk.

Hmangaihna partlanin
'On The Floor' J.Lo leh A-Rod te hian inanna an nei a, nupui leh pasal ṭhen tawh ve ve an ni. Chu chuan an inkara hmangaihna chi ṭiak mek chu tihṭhuanawp phah a hnekin - hmangaihna par an tlandunna kawng a sial ta zawk a ni.

Thla liam ta lawk khan an inzui aṭanga kum hnihna 'anni­versary' an lawm a, ni tam pawh a liam hmain an inhual thu an puang zui leh ta bawk. J.Lo leh A-Rod te hian inneih lam erawh an la sawi ri lova, milar dangte hnungzuiin an inhualna hi a la thamral ve leh thei tho bawk.

• Jennifer Lynn Lopez hi July 24, 1969 khan a piang a, singer, actress, dancer leh producer a ni.
• Alexander Emmanuel Rodriguez hi July 27, 1975 khan piangin, American baseball player a nih bakah commentator-ah a ṭang zui bawk.
• J.Lo hi actor Ojani Noa nen 1997 khan an innei a, a kum lehah an inṭhen leh nghal.
• Hemi hnu hian Cris Judd (2001-2003) leh Marc Anthony (2004-2014) te a nei zui leh.
• Marc Anthony nen hian kum 10 chuang zet an innei hman a, fa pawh pahnih an nei.
• A-Rod hi Cynthia Scurtis nen 2002-2008 chhung an innei a, fa pahnih an nei.
• J.Lo leh A-Rod te hian 2017 khan an in 'date' thu an puang a, March 9, 2019 khan an inhual ta a ni.