BLACKPINK-in YouTube-ah Subscriber mtd 60 chuang nei tawh

K-Pop girl group BLACKPINK chuan YouTube-ah subscriber maktaduai 60 chuang nei tawh, Korean YouTube channel hetiang zat subscriber nei thei hmasa ber an ni.

YG Entertainment-in an tarlan dan chuan April 13 zing dar 6 (KST)-ah khan Blackpink hian subscriber mtd 60 hi an nei tling chiah tih sawiin, kum nga chhung lekin K-Pop girl band hian hetiang record hi an siam thei a ni. Nikum July thla khan Ariana Grande record lo siam tawh chu Blackpink hian lo khum tawhin hmeichhe artist YouTube subscriber ngah ber record an lo siam tawh bawk.

Ariana Grande record siam an khum hnu thla thum chhungin Eminem, Ed Sheeran leh Marshmallow-te subscriber neih zat aia tam an nei leh bawk a, tunah hian Justin Bieber khum leh thut thei dinhmunah an ding mek. Bieber hian subscriber mtd 62 vel a nei mek a, Blackpink hian tun ang renga subscriber an nei ngah chak a nih chuan Bieber pawh hi an la khum thuai dawn a ni.

Blackpink hian music video thar an tihchhuah apiangin YouTube-ah hian nuai tel subscriber an neih belh zel a, an channel-a an video thlirtu zat chu tluklehdingawn 17 lai a ni tawh.