Hontrade International Ṭhazual Fakna-ah Lalremruata 'Krista Thisen' a hlu ber

Lalremruata Fanai chuan a vawi khat nan 'Krista Thisen' tih hla hmangin Hontrade International Ṭhazual Fakna chart-ah dinmun sang ber a luah. Remruata hian chart hmasa lamah khan palina a hauh a, tun ṭumah erawh tuma tluk rual lohin pakhatna-ah a rawn inhlangkai ta a ni.

Hla lehlin
A hla hit 'Krista Thisen' hi hla lehlin niin, a letlingtu hi Manuna Lianhna a ni. Music track hi Muanpuia Renthlei siamsak a ni a, recording hi Kings and Prophets-a tih a ni thung.

Remruata hian January thla khan he hla hi a ti­chhuak a, Ṭhazual chart-ah pawh a inlar nghal a ni. A music video-ah hian PUC Evangelical Choir-ten an zaipui bawk a, a thu a ṭhain ngaihtlak a manhla hle bawk.

Peter-a a inlar
Mizo Idol star Peter Lalnunpuia chuan 'Tlang lamah khian' tih hla hmangin Ṭhazual chart-ah a dinhmun a sawhnghet zui zel a, dinhmun sang ber luah turin pen khat chiah a bak ta. Peter-a hian zawi zawia hmasawniin tun dinhmun hi a thleng a, No.1 pawh a kai theih a beiseiawm.

Mizo Idol aṭanga Zoram mipuiin kan hmelhriat dang, Champhai nula H. Lalremruati chu pathumna a ni. Maruati hian thla hmasa lawk khan a hla thulkhung 'Mawi tawp berin' chu music video siamin a tichhuak a, ngaihthlak a hlawh hle. Tunlai fakna hla thlan hlawh berte zinga mi niin, top 3-ah hian a tawp mai a rinawm loh bawk.

Sangtei Renza
Mi ṭhenkhat chuan film star a nihna hi kan hre lar zawk a ni maithei a, zai lamah pawh talent ṭha tak a lo nei reng a ni tih pawh kan hre chho zel. Sangtei Renza hian 'Mal­sawmna' tih hla hmangin Ṭhazual Fakna chart-ah palina a hauh a, dahhniam chi rual a ni lo.

Sangtei Renza bakah hian Malsawmdawngkimi chu top 5-ah a inhlangkai bawk a, 'A hnen pan la' tih hla hmangin chart-ah hun eng emaw chen chu kan la hmu zui zel dawn a nih hmel hle. Rualthansanga Khiangte chu parukna-ah awmin, Andrew K. Lalchhandama leh Lalremruata ten an dawt a, Zela Chuaungo leh Lal­chhuansanga-te chu top 10-ah an inhlangkai bawk.