Box Office-ah Captain Marvel chhing zo an awm lo
Rin lawk ang ngeiin Captain Marvel chuan Box Office-ah a ropui zia a tarlang nghal a, $mtd 153 teh meuh a lalut. American actress Brie Larson channa hi tun weekend aṭang khan chhuah ṭan a ni a, chhing zo reng an awm lo.
Captain Marvel hi February 27 khan London-ah release a ni a, North America-ah chuan March 8 aṭang khan chhuah ṭan a ni. A tir aṭang phatin a boruak a lian a, kumina film chhuak tawh zingah chuan 'hit' ber leh sum lalut hnem ber a ni mek.
Theater 4,310-ah
Tun lai khawvelah chuan film hlawhtling leh lar ber berte hi fantasy leh science fiction lam an ni tlangpui a, Captain Marvel pawh hi chung zinga mi chu a ni. He superhero film hian North America a tuam mek a, tun weekend chhung ringawt pawh khan theater 4,310 zetah chhuah a ni.
Hetaṭanga a sum lakluh hi $mtd 153 zet a ni a, a namai lo hle. Kumin chhunga film chhuak tawh zingah chuan Box Office-a che ṭha ber niin, $mtd 100 chuang lalut nghal thei awm chhun a ni bawk. Hei hi US leh Canada bik chauh a la ni a, khawvel hmun dang aṭanga a lakluh nen phei chuan turu tak a ni.
Khawvel hmun dangah
North America rual hian khawvel hmun dangah Captain Marvel hi chhuah chhoh mek zel a ni a, a thlen chinah chuan roreltu a ni thei zel. China-ah chuan tun weekend chhung ringawt khan $mtd 85.1 zet a lalut a, mipuiin an hlut tak zet tih a lang.
Hollywood star Brie Larson, Jude Law leh Samuel L. Jackson-te channa film hian khawvel hmun hrang hrang aṭangin $mtd 455 zet a lalut tawh a, record eng emaw zat a siam tawh a ni.
Captain Marvel hian Box Office debut-ah Harry Potter and the Deathly Hallows - Part 2 ($mtd 483), Jurassic World ($mtd 524), Star Wars: The Force Awakens ($mtd 528), The Fate of the Furious ($mtd 541) leh Avengers: Infinity War ($mtd 640)-te chiah tluk loh a nei.
American film director Ryan Fleck leh Anna Boden-te kutchhuak hi tunlai film chhuak thar zingah chuan en hlawh ber a ni mek a, a sum lakluh pawh hi a la sang chho zel dawn niin a lang.
Beisei phak lo
Tun ṭumah hian Indian actress Priyanka Chopra leh Liam Hemsworth-te channa Isn’t It Romantic chuan $mtd 2.4 lalutin pasarihna a ni a, beisei a phak lo zui zel. He fantasy/romance film hi February thla khan tlangzarh niin, tun thlenga a sum lakluh tawh chu $mtd 44 a ni.
How to Train Your Dragon: The Hidden World erawh a che ṭha zui zel a, Tyler Perry’s A Madea Family Funeral nen top 3-ah an inhlangkai a ni. Lego Movie 2: The Second Part, Alita: Battle Angel leh Green Book-te chu sum thawk chhuak hnem zingah an la tel bawk a, Fighting with my Family, Greta leh Apollo 11-te chu top 10-ah an lang bawk a ni.