Bon Jovi album kan hmu leh dawn

American rock band lar Bon Jovi-te hian mi tam tak lung an la len a, an zai ngaihthlak chaka tuihal mi tam tak an awm. Chung mite tan chuan thu lawmawm tak hriat tur a awm a, chu chu album an tichhuak leh dawn tih hi a ni.

Bon Jovi hian Instagram kal­tlangin album an buaipui mek thu an puang a, fans lam pawh an phur tawh hle. An frontman Jon Bon Jovi chuan IG-ah video post in, studio chhunga Tico Torres, David Bryan, Phil X leh Hugh McDonald-te nen recording an nei lai a tilang a ni. Hemi chungchangah hian Ocean Way Nashville Recording Studio pawhin thuchhuah siamin, Bon Jovi-te nen an thawhho thu an puang ve mek bawk.

Bon Jovi hian 2016 khan 'This House is Not for Sale' album an tichhuak a, 2017 khan live album 'Legendary FM Broadcasts - Agora Ballroom, 28th June 1988' an tichhuak leh bawk. Album thar an sawi ri leh ta pawh hi a mak loa, rimawi khawvel chawlhsan mai an la tum lo a ni.

'Knockout' hitmaker-te hian kum ruk hnua a vawi khat nan stadium tour an nei dawn bawk a, UK hmun hrang hrangah an concert dawn a ni. Tour hi June aṭangin an ṭan dawn a, show an neihna tur zingah hian Wembey Stadium leh Liverpool stadium Anfield pawh a tel a ni.